Kryeministri i Shqipërisë, Edi Rama, ka mbrojtur organizimin e koncertit të artistit të njohur Kanye West, duke e cilësuar atë një investim strategjik për promovimin e vendit dhe zhvillimin e turizmit.
Në një reagim të publikuar para koncertit, Rama tha se stadiumi është gati për ngjarjen që, sipas tij, do ta vendosë Shqipërinë në hartën globale të adhuruesve të muzikës.
“Disa vazhdojnë të flasin për 4 milionë euro shpenzim për një natë, por ato 4 milionë janë një investim, i cili do të rikthehet nga mijëra vizitorët që në 48 orët e fundit janë shtuar në hotelet, apartamentet, restorantet, baret, dyqanet dhe taksitë”, u shpreh Rama.
Ai theksoi se një koncert i kësaj përmase nuk është vetëm një ngjarje artistike, por edhe një formë e marketingut global për Shqipërinë.
“Kultura nuk është vetëm ushqim shpirtëror, por edhe ekonomi, turizëm dhe zhvillim”, shkroi kryeministri, duke argumentuar se organizimi i eventeve të mëdha kulturore është praktikë e zakonshme në vendet e zhvilluara.
Rama shtoi se anulimi i koncertit do të ishte një dëm për imazhin e Shqipërisë, ndërsa përfundoi mesazhin e tij me deklaratën:
Shqipëria nuk fiton duke u fshehur nga bota. Shqipëria fiton duke e sjellë botën në shtëpinë e saj./teve1.info/
