Policia e Kosovës ka dhënë detaje lidhur me arrestimin e një 16-vjeçari, i dyshuar për plagosjen me thikë të dy personave mëngjesin e sotëm pranë Postës Qendrore në Ferizaj.
Sipas njoftimit policor, njësitë kanë reaguar menjëherë pas marrjes së informatës për rastin, ku në vendngjarje kanë gjetur një person të lënduar nga arma e ftohtë, ndërsa një tjetër kishte pësuar lëndime gjatë përpjekjes për t’u larguar nga i dyshuari.
Pas sulmit, i dyshuari ishte larguar nga lokacioni, ndërsa hetuesit rajonalë në Ferizaj, të mbështetur edhe nga njësi të tjera policore, kanë nisur kërkimet për gjetjen e tij.
Pas kontrolleve në disa lokacione, policia ka arritur ta lokalizojë të dyshuarin.
Gjatë ndërhyrjes, sipas Policisë, 16-vjeçari ka refuzuar t’u bindet urdhrave të zyrtarëve policorë dhe ka mbajtur një thikë në dorë.
Policia bën të ditur se i dyshuari ka sulmuar zyrtarët me gurë dhe mjete të forta, si dhe është vërsulur ndaj tyre me thikë.
Gjatë përpjekjeve për neutralizimin e situatës, tre zyrtarë policorë kanë pësuar lëndime, ndërsa njëri prej tyre është goditur me thikë në pjesën e qafës.
Sipas njoftimit, gjatë ndërhyrjes, nëna e të dyshuarit, D.GJ (47 vjeçe), dyshohet se ka penguar zyrtarët policorë në kryerjen e detyrës zyrtare.
Policia ka bërë të ditur gjithashtu se në një moment i dyshuari ka marrë një shishe me benzinë dhe ia ka hedhur vetes mbi trup, duke vazhduar t’i kërcënojë zyrtarët me thikë.
Pas ndërhyrjes, i dyshuari P.GJ (16 vjeç) është arrestuar së bashku me nënën e tij. Në vendngjarje është sekuestruar edhe thika që dyshohet se është përdorur në sulmin ndaj qytetarëve.
Me vendim të prokurorit të shtetit, i dyshuari është ndaluar për 24 orë, ndërsa hetimet lidhur me rastin janë duke vazhduar./teve1.info/
