Për plot pesë vjet, Mimoza Berbatovci Ukimeraj shërbeu si drejtoreshë në Klinikën e Nefrologjisë.
Por, të hënën, dorëheqje paraqiti nga kjo pozitë.
E këtë vendim e bëri të ditur vetë ajo.
Sipas Berbatovci-Ukimeraj, vendimi erdhi si pasojë e mungesës së bashkëpunimit institucional, dhe presionit të vazhdueshëm.
“Ju njoftoj që pas 5 viteve në detyrë, kam marrë vendim të jap dorëheqje nga posti i Drejtoreshës së Klinikës së Nefrologjisë. Ky vendim vjen pas një periudhe të gjatë përpjekjesh për të ushtruar detyrën me profesionalizëm, integritet dhe transparencë, në rrethana të karakterizuara nga mungesa e bashkëpunimit institucional me strukturat udhëheqëse të SHSKUK-së dhe QKUK-së dhe nga presionet e vazhdueshme që kanë cenuar pavarësinë time profesionale si dhe kanë pamundësuar ushtrimin normal të përgjegjësive që burojnë nga kjo pozitë”, ka njoftuar Berbatovci Ukimeraj.
E shpesh ish-drejtoresha thotë se kishte pasur edhe pengesa në realizimin e punës.
“Kam qenë dhe mbetem e bindur se çdo funksion drejtues duhet të ushtrohet mbi bazën e ligjit, etikës profesionale, bashkëpunimit institucional dhe respektit të ndërsjellë. Kur këto parime mungojnë dhe kur krijohen kushte që pengojnë realizimin e përgjegjësive në interes të pacientëve, stafit dhe institucionit, dorëheqja bëhet një akt përgjegjësie dhe integriteti profesional dhe personal, e kurrsesi tërheqje nga përgjegjësia”, ka njoftuar tutje Berbatovci Ukimeraj.
Në lidhje me këto akuza është pyetur edhe ShSKUK, por të njetit nuk kanë kthyer përgjigje deri në publikimin e kronikës.
Ndërsa sipas ekspertit të shëndetësisë, Bujar Vitia kjo nuk është hera e parë që drejtorët nga QKUK japin dorëheqje për këtë arsyje.
“Kjo nuk është hera e parë që dorëhiqen drejtorët e klinikave të ShSKUK-së për shkak të presioneve. Por konsideroj që në rastin e Klinikës së Nefrologjisë është shqetësuese edhe për faktin e presionit që i ka përmendur doktoresha Mimoza dhe konsideroj që duhet ta alarmimi Ministrinë e Shëndetësisë dhe bordin drejtues të ShSKUK-së, sepse në këtë klinikë përdoren materiale të cilat kanë kosto mjaft të lartë me miliona euro brenda një viti”, u shpreh Vitia.
Në lidhje me këtë qështje televizioni ka dërguar pyetje edhe Ministrisë së Shëndetësisë, të cilët janë shprehur se menaxhimi i stafit në QKUK është kompetencë e SHSKUK-së dhe jo e tyre.
