Është ndër komunat më të mëdha në Kosovë.
Megjithatë siç duket, Ferizajn po e rëndon mungesa e mbështetjes nga niveli qendror.
Kjo pasi, siç thonë nga pushteti lokal, telashe kanë me kontratat kolektive.
Ky hall ka kapluar Drejtorinë e Shëndetësisë në këtë Komunë.
Kjo kontratë, siç thonë nga kjo Drejtori, po rëndon buxhetin e kujdesit parësor shëndetësor.
“…Duke pasur parasysh se e kemi furnizimin e dobët të barnave esenciale nga Ministria e Shëndetësisë, e kemi të pamundur të furnizohemi edhe me terapi esenciale ampulare, edhe për kujdestari të natës edhe për emergjencë, por edhe për kujdesin paliativ në teren”, thotë Kemajl Emini – drejtor i Shëndetësisë dhe Mirëqenies Sociale në Ferizaj.
Emini thotë se dëmi i shkaktuar nga Kontrata Kolektive është 17 milionë euro.
“Ne e kemi 45 milionë diku krejt buxhetin e me 17 milionë i bien me i marrë krejt investimet kapitale. Po sikur të na jepte Qeveria 17 milionë kishim mundur me i krye disa punë e jo me na i marrë”, shprehet ai.
I njëjti paralajmëron se pacientët mund të hasin në të ardhmen vështirësi në marrjen e shërbimeve.
“Mungesa e furnizimit është duke na penalizuar për me u furnizu me terapi me ble. Kështu që le ta ketë të qartë qytetari ferizajas që do të ketë pengesa edhe në terapi, edhe në staf edhe në shërbime tjera”, thotë Emini.
Por nga Ministria e Shëndetësisë thonë se i gjithë furnizimi është kryer në bazë të kërkesës së QKMF-së.
“Bazuar në Sistemin për Menaxhimin e Stokut Farmaceutik, furnizimi i QKMF-së në Ferizaj është realizuar në përputhje me planifikimin dhe kërkesat e pranuara”, kanë thënë nga MSH.
Në anën tjetër, opozita në këtë Komunë vlerësojnë se faji nuk qëndron te Kontrata kolektive.
“Shifra prej 17 milionë eurove që kinse i ka marr Kontrata Kolektive nuk qëndron, është shumë e lehtë të verifikojmë këtë shumë mjafton të dimë numrin e mësimdhënësve në Komunën tonë edhe nga sa para i kanë marrë ata mësimdhënës…këtu kemi të bëjmë me një keqplanifikim dhe keqmenaxhim dhe keqpërdorim të parasë publike”, shprehet Amir Rexhepi, asambleist i LVV-së.
Rexhepi konsideron se Komuna ka mundur të planifikojë buxhet me kohë për Kontratën Kolektive, në mënyrë që siç thotë ai, të mos kishte pasoja të tilla.
