Problemet me shëndetin e detyruan të kërkojë ndihmë mjekësore.
Kështu, L.R., 52 vjeçar nga Vitia, u paraqit në Shërbimin e Urgjencës së këtij qytetit.
E pas kontrolleve të para , mjekët panë se gjendja e tij nuk qe fare e mirë, sipas mjekut të urgjencës në Viti, Ardi Ademi.
“Është paraqitur këtu në shërbimin e urgjencës primare me djersitje dhe plogështi trupore. Fillimisht kemi vazhduar me realizimin e një EKG-je, ku vërehet që pacienti është duke pësuar infarkt masiv së bashku me kolegun tim dr. Imerin dhe stafin e mrekullueshëm në QKMF në Viti, i kemi dhënë ndihmën e parë pacientit, i kemi dhënë terapinë adekuate sipas protokollove dhe së bashku me dr. Imerin kemi vendosur që urgjentisht të e transferojmë për në Spitalin Rajonal të Gjilanit”, deklaroi Ardi Ademi.
Megjithatë, sapo mbërriti në Spitalin Rajon të Gjilanit, gjendja e pacientit u përkeqësua.
“Gjatë hyrjes për në Spitalin Rajonal të Gjilanit,pacientit veç se fillon duke iu keqësuar gjendja ku i bie saturimi dhe i vije mundim dhe shtrëngime në gjoks. Duke e hipur në spital tek shkallët ne kemi godituri fillimisht pacientin, dy deri në tre herë me grusht dhe pacienti është rikthyer në jetë. Pasi pacienti është rikthyer në jetë është hyrë në fibrilacion”, shtoi Ademi.
Gjendja kritike e pacientit u përsërit çdo pesë minuta, ndonëse mjekët po bënin të pamundurën të mbanin në jetë.
“Bëhen diku rreth 16 defibrilime, poashtu vlen me cekë se i është dhënë terapia adekuate në bazë të protokollove në krye me dr. Begushin dhe së bashku në konsultim me të i cili ka qenë aty në urgjencë ka ardhur në përfundim që pacientit nuk guxon të transferohet në Prishtinë, për shkak të gjendjes së rënduar dhe ndihma e parë duhet të i jepet në spital deri në stabilizimin e gjendjes e pastaj të transferohet për në QKUK”, pohoi doktori i urgjencës në Viti, Ardi Ademi.
E për në QKUK, shefi i emergjencës në Gjilan vendosi ta dërgojë vetëm pas stabilizimit të gjendjes.
“Beteja ka vazhduar afërsisht 55 minuta, 13:45 është ardh 14:40 ne veç se e kemi fituar një ritëm, një qarkullim spontan me parametra stabil. Ky ka qenë një rast i rëndë ka qenë bllokim i një degë të enës, një infarkt masiv i rëndë dhe gjendja ka qenë e tillë që në mënyrë konsistente pa ndërprerë, pa hezituar e pa u lodhë me vazhdua betejën deri në fund”, deklaroi shefi i emergjencës në Gjilan, Begush Canaj.
Për reagimin profesional të stafit në Viti u shpreh krenar edhe shefi i Urgjencës në këtë Komunë, Gazmend Halili
“Është kënaqësi kur kemi në radhët tonë mjekë të rinjtë të cilët, përveç ngritjes profesionale kanë edhe guxim me u marr me rastin. Ky është një ndër rastet e shumta që i kemi, por është rast pak më i rëndë se është bëri febrilimi diku më shumë se 15 herë”, tha Halili.
Falë reagimit të shpejtë dhe punës së koordinuar të ekipeve mjekësore në Viti, Gjilan dhe më pas në QKUK, pacienti arriti të mbijetojë.
Në QKUK atij iu vendos stent, ndërsa gjendja e tij shëndetësore tashmë është e mirë.
Pas trajtimit spitalor, 52 vjeçari është liruar për në shtëpi, ku po e vazhdon rikuperimin.
