Nën udhëheqjen e ministres së Drejtësisë në detyrë, Donika Gërvalla, të enjten është mbajtur takimi për shqyrtimin dhe finalizimin e pesë projektligjeve që janë pjesë e Deklaratës së Përbashkët të Zotimit për reformë në drejtësi.
Gjatë takimit janë diskutuar dhe u harmonizuar dispozitat e pesë projektligjeve, me synimin që ato të finalizohen në përputhje me standardet kushtetuese dhe praktikat më të mira ndërkombëtare.
“Reforma në drejtësi nuk është thjesht një proces ndryshimesh ligjore. Është një domosdoshmëri shtetërore për ndërtimin e një sistemi drejtësie që nuk toleron kompromis me integritetin, që e vendos llogaridhënien në themel dhe që rikthen besimin e qytetarëve në institucionet e drejtësisë”, ka deklaruar Gërvalla.
Ajo ka ritheksuar përkushtimin për zbatimin e reformave që forcojnë sundimin e ligjit në Kosovë, përmes dialogut ndërinstitucional dhe bashkëpunimit me institucionet e sistemit të drejtësisë./teve1.info/
