Partia Demokratike e Kosovës (PDK) ka reaguar pas shtyrjes së radhës së shpalljes së aktgjykimit në rastin ndaj ish-udhëheqësve të Ushtrisë Çlirimtare të Kosovës në Hagë.
Në një reagim publik, PDK ka shprehur indinjatën për, siç e ka cilësuar, zvarritjen e procesit gjyqësor, duke theksuar se pas gati gjashtë vitesh paraburgim dhe një procesi disa vjeçar, nuk bëhet më fjalë për vonesë procedurale.
“Kjo nuk është më një vonesë procedurale, por një zvarritje e pajustifikueshme që cenon besimin në drejtësi dhe rëndon padrejtësisht mbi ish-udhëheqësit e UÇK-së, familjet e tyre dhe qytetarët e Kosovës,” thuhet në reagim.
PDK ka kërkuar që aktgjykimi të bazohet vetëm në ligj, faktet e vërtetuara gjatë procesit gjyqësor dhe standardet më të larta të drejtësisë, duke u larguar nga çdo pretendim i pabazuar.
Partia gjithashtu ka ritheksuar se lufta e Ushtrisë Çlirimtare të Kosovës ishte e drejtë dhe çlirimtare, e zhvilluar për lirinë e vendit dhe e mbështetur nga bota demokratike.
“Kjo e vërtetë historike nuk mund të zhbëhet nga asnjë proces gjyqësor dhe as të relativizohet nga zvarritjet e vazhdueshme,” thuhet më tej.
Në fund, PDK ka kërkuar përfundimin e procesit dhe ka thënë se pret që drejtësia të vihet në vend, në mënyrë që ish-udhëheqësit e UÇK-së të kthehen të lirë në Kosovë.
Ndryshe, Dhomat e Specializuara të Kosovës në Hagë njoftuan të mërkurën se aktgjykimi për katër ish-udhëheqësit e Ushtrisë Çlirimtare të Kosovës: Hashim Thaçin, Kadri Veselin, Jakup Krasniqin dhe Rexhep Selimin – do të shpallet më 16 shtator të këtij viti, në orën 10:00.
Fillimisht, Trupi Gjykues kishte afat deri më 19 maj për të shpallur vendimin. Por, duke u thirrur në kompleksitetin e rastit, ai vendosi ta shtynte këtë afat deri më 20 korrik 2026 dhe tani vendosi përfundimisht për 16 shtator.
Thaçi, Veseli, Krasniqi dhe Selimi, akuzohen për vepra si vrasje, torturim dhe përndjekje, gjoja të kryera gjatë viteve 1998-’99 gjatë luftës për pavarësimin e Kosovës nga Serbia./teve1.info/
