Nënkryetarja e Partisë Demokratike të Kosovës (PDK), Vlora Çitaku, ka reaguar pas njoftimit të Dhomave të Specializuara në Hagë se aktgjykimi për katër ish-udhëheqësit e Ushtrisë Çlirimtare të Kosovës do të shpallet më 16 shtator të këtij viti.
Në një postim në Facebook, Çitaku ka kritikuar shtyrjet e përsëritura të procesit gjyqësor, duke thënë se ato nuk kanë më asnjë lidhje me drejtësinë.
Sipas saj, shtyrjet mund ta vonojnë aktgjykimin, por nuk mund ta ndryshojnë të vërtetën.
“16 shtator 2026, ora 10:00. Edhe dita e shpalljes së aktgjykimit po shtyhet sërish. Vonesat mund ta shtyjnë aktgjykimin, por nuk mund ta ndryshojnë të vërtetën. Këto vonesa të turpshme nuk kanë më asnjë lidhje me drejtësinë. Drejtësia e vonuar nuk është drejtësi,” ka shkruar Çitaku.
Ajo ka theksuar se PDK-ja beson në drejtësi të vërtetë dhe jo në drejtësi politike, duke shtuar se “më në fund do të flasë drejtësia për Kosovën dhe UÇK-në.”
“Ne besojmë në drejtësi. Jo në drejtësi politike, por në drejtësi të vërtetë. Drejtësi për çlirimtarët. Drejtësi për historinë. Drejtësi për të ardhmen.
Besojmë se, më në fund, do të flasë drejtësia. Për Kosovën. Për UÇK-në”, ka përfunduar ajo.
Ndryshe, Dhomat e Specializuara të Kosovës në Hagë njoftuan të mërkurën se aktgjykimi për katër ish-udhëheqësit e Ushtrisë Çlirimtare të Kosovës: Hashim Thaçin, Kadri Veselin, Jakup Krasniqin dhe Rexhep Selimin – do të shpallet më 16 shtator të këtij viti, në orën 10:00.
“Trupi Gjykues shpjegoi se koha e nevojshme për kuvendimet ishte zgjatur në përputhje me Rregulloren, për shkak të vëllimit të madh të provave të marra dhe kompleksitetit të procesit gjyqësor, dhe se kjo zgjatje përligjej nga nevoja për të bërë një vlerësim të arsyetuar, tërësor dhe të drejtë të dokumentacionit të çështjes”, thuhet në njoftim.
Fillimisht, Trupi Gjykues kishte afat deri më 19 maj për të shpallur vendimin.
Por, duke u thirrur në kompleksitetin e rastit, ai vendosi ta shtynte këtë afat deri më 20 korrik 2026 dhe tani vendosi përfundimisht për 16 shtator.
Thaçi, Veseli, Krasniqi dhe Selimi, akuzohen për vepra si vrasje, torturim dhe përndjekje, gjoja të kryera gjatë viteve 1998-’99 gjatë luftës për pavarësimin e Kosovës nga Serbia.
Që të katërtit i kanë mohuar këto akuza dhe janë deklaruar të pafajshëm për akuzat që përfshijnë rreth 155 viktima.
Ndërkaq, prokurorët kanë kërkuar që ata të shpallen fajtorë dhe secili të dënohet me nga 45 vjet burgim për krimet e pretenduara./teve1.info/
