Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur në takim një delegacion amerikan të kryesuar nga profesori Daniel Serwer, në kuadër të iniciativës “America250”, në prag të 250-vjetorit të Pavarësisë së Shteteve të Bashkuara të Amerikës.
Gjatë takimit, gjenerallejtënant Jashari ka falënderuar delegacionin për vizitën dhe për mbështetjen e vazhdueshme të SHBA-së ndaj Kosovës, duke theksuar partneritetin e ngushtë ndërmjet FSK-së dhe institucioneve amerikane të mbrojtjes.
Ai i ka informuar mysafirët për zhvillimet dhe avancimin e kapaciteteve të FSK-së, si dhe për rolin e saj në garantimin e sigurisë dhe stabilitetit rajonal.
Nga ana tjetër, profesori Serwer dhe delegacioni amerikan kanë vlerësuar progresin e FSK-së dhe kontributin e saj në bashkëpunimet ndërkombëtare.
Sipas njoftimit, palët kanë diskutuar edhe për situatën e sigurisë në rajon dhe për rëndësinë e avancimit të FSK-së drejt integrimit në strukturat euroatlantike.
Në përmbyllje, Jashari ka uruar delegacionin amerikan për jubileun e 250-vjetorit të pavarësisë së SHBA-së, duke e cilësuar atë si simbol të miqësisë dhe partneritetit mes dy vendeve./teve1.info/
