Ndonëse kanë kaluar 16 muaj që nga parashtrimi i ankesës, Berisha thotë se edhe në qoftë se tash jepet një vendim, kësaj çështjeje i ka humbur efekti.
“Në rastin tonë, krejt çka ne po kërkojmë, sepse ne mendojmë që po t’i kushtojmë kujdes nga Gjykata Kushtetuese, maksimalisht ky rast do duhej t’i merrte rreth 5 muaj. Sepse vetëm do ta vërtetonte se a janë përdorur dy standarte apo nuk janë përdorur. Kaq ishte. Për të pritur 16 muaj mendoj që i ka humbur efekti dhe çfarëdo vendimi që vjen pastaj. Sepse gjysma e mandatit po kalon. Egjiptianët nuk e kanë një përfaqësim brenda Kuvendit të Kosovës”, tha ai në “Info Nata” në Tëvë 1.
Tutje, ai kërkoi nga GJK-ja që të dalë sa më shpejt me një vendim.
“Normalisht që ne kërkojmë që Gjykata Kushteteuese të dalë sa më shpejt me një vendim, cilido qoftë ai, vetëm të del, sepse vërtetë i ka humbur kuptimi çfarëdo vendimi që do të dalë. Nuk do të ketë shumë efekt. Nuk e di çka do të bëjmë tash e tutje”, shtoi ai.
Më 13 prill të vitit 2021, Berisha kishte dorëzuar ankesë në Gjykatën Kushtetuese lidhur me votat nga ana e subjektit Romani Iniciativa, në vendbanimet me shumicë të komunitetit serb, në zgjedhjet e parakohshme të 14 shkurtit.
Në këto zgjedhje, parti të minoriteteve akuzuan Listën Serbe se ka ndikuar që serbë të komunave të ndryshme të votojnë për parti të tjera të minoriteteve tjera në mënyrë që të shtohet ndikimi i saj në Kuvend. /Teve1.info/
