Mbështetës të opozitës, demokratë nga veriu e jugu kanë protestuar për 2 orë përpara Kryeministrisë kundër rritjes së çmimeve dhe nismës rajonale të Ballkanit të Hapur.
Kreu i PD-së ka shkuar drejt Kryeministrisë i shoqëruar nga deputetë dhe aleatë të tij. Gjatë protestës mbajtën fjalime personalitete të ndryshëm, sipërmarrës, studentë dhe politikanë. Ata kërkuan largimin e qeverisë Rama.
Teksa kryeministri u fut “live” nga Vlora në hapjen e Bypassit, lideri i demokratëve pati disa mesazhe të drejtpërdrejta për Ramën. “Rama ne të dy sot jemi armiq”, u shpreh Berisha duke i bërë thirrje që të largohet. Me flamur në dorë, Berisha u betua se demokratët nuk do ta falin kurrë votën.
Nga protesta e opozitës, kryetari i PD-së Sali Berisha i ka kërkuar Kryeministrit të ikë duke e akuzuar se ka vjedhur. Pas fjalës së kryetarit të PD, është mbyllur edhe protesta e opozitës, e cila zgjati vetëm pak minuta më shumë nga sa ishte parashikuar nga organizatorët e saj.
Policia kishte marrë masat e saj për mbarëvajtjen e protestës. Në terren kanë qenë mbi 1200 efektivë të komisariateve të forcave të ndërhyrjes së shpejtë, por edhe agjentë civilë. Gjithashtu në kuadër të protestës ka pasur bllokime të disa segmenteve rrugore si: bulevardi “Dëshmorët e Kombit”; rruga “Gjergj Fishta”; bulevardi “Bajram Curri” bulevardi Zhan D’Ark.
Kjo është protesta e parë e opozitës që nga marrja e drejtimit të Partisë Demokratike nga ana e Sali Berishës.
