Një person ka humbur jetën si pasojë e një aksidenti trafiku që ka ndodhur rreth orës 02:00 pas mesnate në rrugën “Tirana” në Gjakovë.
Zëdhënësja e Policisë për rajonin e Gjakovës, Vlera Krasniqi, ka konfirmuar se në aksident kanë qenë të përfshira një veturë dhe një motoçikletë.
Sipas saj, si pasojë e përplasjes, drejtuesi i motoçikletës ka pësuar lëndime të rënda trupore dhe nuk ka mundur t’u mbijetojë plagëve të marra.
“Në orët e para të mëngjesit, rreth orës 02:00, në rrugën ‘Tirana’ në Gjakovë, ka ndodhur një aksident trafiku në të cilin janë përfshirë një veturë dhe një motoçikletë. Si pasojë e këtij aksidenti, drejtuesi i motoçikletës ka pësuar lëndime të rënda trupore dhe nuk ka mundur t’u mbijetojë plagëve të marra. Në koordinim me Prokurorin e Shtetit, trupi i pajetë i viktimës është dërguar për ekzaminim mjeko-ligjor”, ka thënë Krasniqi.
Ajo ka bërë të ditur se ndaj drejtuesit të veturës është caktuar masa e ndalimit policor prej 48 orësh për procedura të mëtejshme hetimore.
