Ka mbi katër dekada që punon si tregtar.
E pjesën më të madhe të jetës, Shaban Bislimi, e kaloi në këtë tezgë brenda Tregut e Gjelbër në Prishtinë.
Por për gjithë këto vite, Bislimi thotë se kushtet në këtë treg, mbeten të njëjta.
Madje për këtë, tregtarët u ankuan edhe tek kryetari i Prishtinës.
“Si tregtar kam pas shumë takime me kryetarin Rama, premtime kemi shumë ato janë për dislokim të tregut përkohësisht jo për gjithë në këtë pjesën këtu ku ka qenë AKP më herët. Aty na ka premtuar se do të na mbajë 15 muaj për me u rikthyer prapë në tregun që jemi duke funksionuar tani”, thotë Shaban Bislimi – tregtar.
E së fundmi, Komuna e Prishtinës, ka marrë miratimin me kusht, për ndërtimin e tregjeve të gjelbra.
E gjithë kjo, parashihet në hapësirën ku dikur ndodheshin zyrat e Agjencisë Kosovare të Privatizimit.
Por, tregtaret thonë se edhe tregu i ri, duhet të ndërtohet në lokacionin e të vjetrit.
“Kërkesa jonë kryesore është mos me u largu prej këtij tregu ku jemi, se këtu njihet që është tregu i vjetër edhe njerëzit në Prishtinë e kudo e njohin këtë vend shumë mirë. E nga praktikat se qysh i kemi pa në qytetet e tjera, ku është ndërrua destinacioni i tregut gjithmonë ka pas dështime e edhe ne si tregtarë mendojmë se do të kemi dështim në qoftë se ndërrohet lokacioni”, shprehet Bislimi.
Por, pavarësisht dëshirës së tregtarëve, nga Komuna e Prishtinës, thonë se punimet tashmë kanë filluar.
“Ne veç kemi filluar punimet në bazë të një kontrate që e kemi nënshkruar me një operatorë ekonomik rreth 70/80% e punimeve nëntokësore kanë përfunduar, që përfshin ujërat fekale, ujin e pijes edhe elektrik. Për pjesën tjetër ne kemi pasur ndalim aty nga Inspektorati i Ministrisë së Kulturës. Mirëpo, pas disa takime, kemi arrit si me thanë një zgjidhje edhe nga ana e tyre jemi pajisur me një draft leje e cila i ka disa kushte për disa ndryshime të vogla në projekt e që po shpresojmë që në afat prej 10 ditësh kemi me u pajis me leje dhe me fillu me të gjitha punimet në atë pjesë”, thotë Liridon Shahini –udhëheqës i sektorit për investime kapitale.
E të vonuar këtë projekt, po e vlerëson opozita në kryeqytet.
“Realisht kur është koha e votave Përparimi më së shumti del e merr vota aty në treg e ju premton atyre që ka me ua rregulluar një treg të mirë të gjelbër, por kurrë nuk e ka bërë deri më tani. Ky premtim është i vonuar është bërë qe pesë vite e nuk ka bërë asgjë. Unë mendoj se tash është dashur me përfunduar e jo me fillua, por ka shkelë rregulla dhe ligje duhet me kuptuar që nuk mundet me ecë tutje pa i respektuar këto ligje dhe rregulla. E tash kur i ka plotësuar këto standarde ju ka dhënë pëlqimi.”, thotë Enver Redenica, asambleist i VV-së.
Ndryshe, hapësira ku parashihet ndërtimi i tregut të ri, ndodhet brenda Qendrës Historike të Prishtinës.
Për detaje më shumë rreth këtij projekti, Tëvë1 ka dërguar pyetje edhe në Institutin e Kosovës për Mbrojtjen e Monumenteve Kulturore.
Por të njëjtit nuk kanë kthyer përgjigje.
