Në mbledhjen e 25-të, Qeveria e Republikës së Kosovës ka miratuar dy propozim-vendime të paraqitura nga Ministria e Drejtësisë për ndalimin e përkohshëm të ekzekutimit të akteve të Odës së Avokatëve të Kosovës.
Vendimi i parë ka të bëjë me pezullimin e zbatimit të Rregullores për Pranimin dhe Trajtimin e Thirrjeve Telefonike në Sistemin e Caktimit të Avokatëve sipas Detyrës Zyrtare (ex officio).
Sipas ministres së Drejtësisë në detyrë, Donika Gërvalla, disa dispozita të kësaj rregulloreje mund të krijojnë pengesa praktike në funksionimin efektiv të mekanizmit të caktimit të mbrojtësve, veçanërisht në fazat fillestare të procedurës penale.
“Ky veprim synon të sigurojë ruajtjen e standardeve kushtetuese dhe ligjore të së drejtës për mbrojtje, si dhe të garantojë funksionimin e drejtë dhe efektiv të mekanizmit të mbrojtjes juridike, e veçanërisht mbrojtjen absolute të të drejtave themelore të njeriut për palët e së drejtës”, ka thënë ajo duke nënvizuar domosdoshmërinë që zbatimi i Rregullores për Pranimin dhe Trajtimin e Thirrjeve Telefonike në Sistemin e Caktimit të Avokatëve sipas Detyrës Zyrtare të pezullohet përkohësisht, deri në vendimin përfundimtar të gjykatës.
Po ashtu, Qeveria miratoi edhe propozim-vendimin për ndalimin e ekzekutimit të aktit që përcakton lartësinë e shpenzimeve për regjistrim në Odën e Avokatëve të Kosovës.
Sipas Gërvallës, ky akt nuk është në përputhje me Ligjin për Avokatinë, i cili përcakton se tarifa e regjistrimit nuk mund të jetë më e lartë se tri paga minimale.
Aktualisht, tarifa e regjistrimit në Odën e Avokatëve arrin në 1,275 euro, ndërsa nga muaji korrik ishte paraparë të rritej në 1,500 euro.
“Duke pasur parasysh rëndësinë e garantimit të zbatimit te ligjeve ne fushën e drejtësisë, dhe nevojën për funksionim të pandërprerë të sistemit të caktimit të mbrojtësve sipas detyrës zyrtare (ex officio), dhe bazuar në kompetencën e Qeverisë për mbikëqyrjen e ligjshmërisë së akteve të Odës së Avokatëve të Kosovës dhe të drejtën për të ndaluar ekzekutimin e tyre deri në vendimin përfundimtar të gjykatës kompetente, vlerësojmë të domosdoshme që zbatimi i lartësisë së shpenzimeve për regjistrim të pezullohet përkohësisht, deri në vendimin përfundimtar të gjykatës”, ka përmbyllur Gërvalla./teve1.info/
