Policia e Kosovës ka sekuestruar një arsenal armësh dhe municionesh në një aksion të zhvilluar në Podujevë, ndërsa tre persona të dyshuar janë shpallur në kërkim.
Sipas raportit policor, më 22 qershor 2026, rreth orës 17:30, gjatë një kontrolli në dy valixhe të vendosura në një depo, janë gjetur dhe sekuestruar pesë armë të gjata të tipit AK-47, një armë e gjatë e modelit M12, një armë e gjatë me prodhues të panjohur, një pistoletë Glock, nëntë karikatorë si dhe 144 fishekë të kalibrave të ndryshëm.
Hetimet paraprake kanë zbuluar se tre të dyshuar meshkuj kosovarë dyshohet se ishin organizuar për t’i transportuar armët drejt Shtutgartit në Gjermani.
Me urdhër të prokurorit kompetent, policia ka kryer bastisje në shtëpitë e personave të dyshuar, mirëpo ata nuk janë gjetur në lokacionet e kontrolluara dhe aktualisht ndodhen në kërkim.
Armët dhe municioni janë sekuestruar si prova materiale, ndërsa rasti është duke u trajtuar në procedurë hetimore nga organet kompetente.
“Podujevë / 22.06.2026 – 17:30. Policia gjatë kontrollit në dy valixhe që ishin në një depo ka gjetur dhe sekuestruar: pesë armë të gjata AK47, një armë të gjatë të modelit M12, një armë të gjatë prodhuesit të panjohur, një pistoletë Glock, nëntë karikatorë dhe 144 fishekë kalibrash të ndryshëm. Lidhur me rastin paraprakisht policia ka marrë informata se tre të dyshuar meshkuj kosovarë ishin organizuar që armët e lartcekura të dërgonin në Shtutgard, Gjermani. Me urdhër të prokurorit janë bastisur shtëpitë e të dyshuarve mirëpo, të dyshuarit nuk janë hasur dhe të njëjtit janë në kërkim të policisë. Rasti në procedurë hetimore”, thuhet në raport./teve1.info/
