Një person është arrestuar nga Policia e Kosovës në lidhje me vdekjen e një 24-vjeçari në vendin e tij të punës të hënën në Prizren.
Sipas raportit 24-orësh të Policisë, i dyshuari me vendim të prokurorit është dërguar në mbajtje, ndërsa hetimet po vazhdojnë.
“Viktima mashkull kosovar derisa ka qenë në vendin e punës është lënduar nga një mjet pune. Nga lëndimet e marra viktima ka ndërruar jetë, vdekjen e të cilit e ka konstatuar mjeku kujdestar. Me vendim të prokurorit trupi i pajetë është dërguar në IML për obduksion, ndërsa lidhur me rastin është arrestuar i dyshuari mashkull kosovar dhe me vendim të prokurorit është dërguar në mbajtje. Rasti në procedurë hetimore”, thuhet në raportin e PK-së.
Rasti është iniciuar si “Asgjësimi, dëmtimi apo heqja e pajisjeve mbrojtëse në vendin e punës” dhe ndodhet në procedurë hetimore.
Ndryshe, 24-vjeçari ka humbur jetën në një vendpunishte në Prizren, pasi dyshohet se gjatë procesit të betonimit të një objekti në ndërtim është goditur nga vinçi./teve1.info/
