Policia e Kosovës ka njoftuar se një djalë 15-vjeçar ka gjetur një kuletë me dokumente personale dhe 153 euro para të gatshme, në rrugën Dragash–Brod, afër fshatit Kukajan, derisa po lëvizte me biçikletë.
Sipas njoftimit zyrtar, i mituri e ka dorëzuar menjëherë kuletën në Stacionin Policor në Dragash.
Pas verifikimit të dokumenteve, pronari është identifikuar dhe është kontaktuar nga policia.
Më 19 qershor 2026, rreth orës 10:00, pronari është paraqitur në stacion dhe ka marrë sendet e humbura, duke falënderuar të riun për gjestin e tij, si dhe Policinë e Kosovës për angazhimin në kthimin e kuletës.
“Policia e Kosovës vlerëson lartë këtë veprim, i cili dëshmon ndershmëri, përgjegjësi dhe bashkëpunim qytetar me institucionet e rendit”, theksohet në fund të njoftimit./teve1.info/
