Dy vajza që dyshohet se janë nga fshati Topanicë e Kamenicës, kanë humbur jetën në një aksident të rëndë trafiku në Gjermani.
Sipas raportimeve të një mediumi lokal në Kosovë, viktimat janë E.Z., 24 vjeçe, dhe A.Z., 18 vjeçe.
Ndërkohë, mediat gjermane raportojnë se aksidenti ndodhi në autostradën A5 pranë Appenweierit, në drejtim të Karlsruhe-s. Sipas informacioneve paraprake të policisë, përplasja fillestare ka ndodhur mes dy automjeteve, ndërsa dyshohet se shkaku ishte një manovër e pasuksesshme për ndryshimin e korsisë.
Pas përplasjes së parë, në vendngjarje u shkaktua edhe një aksident zinxhiror ku u përfshinë gjithsej pesë automjete. Dy vajzat që udhëtonin në të njëjtën veturë humbën jetën në vendngjarje, ndërsa një person tjetër pësoi lëndime të rënda.
Autoritetet gjermane kanë bërë të ditur se personat e përfshirë në automjetet e tjera nuk kanë pësuar lëndime. Ndërkohë, policia rrugore në Baden-Baden ka nisur hetimet për të zbardhur rrethanat e sakta të aksidentit.
Për shkak të ngjarjes, autostrada A5 mbeti e mbyllur për disa orë, ndërsa dëmet materiale vlerësohen të jenë mbi 100 mijë euro.
