Qeveria në detyrë e Kosovës ka mbajtur të premten mbledhjen e saj të 24-të në formë elektronike, gjatë së cilës ka miratuar një sërë vendimesh që lidhen me emërime në pozita të larta drejtuese dhe funksionimin e institucioneve shtetërore.
Sipas njoftimit të Zyrës së Kryeministrit, është miratuar emërimi i Komisionit të Pranimit për përzgjedhjen e Sekretarit të Përgjithshëm në Ministrinë e Industrisë, Ndërmarrësisë, Tregtisë dhe Inovacionit, si dhe i Komisionit të Pranimit për pozitën e Komisionerit për Gjuhët.
Po ashtu, ekzekutivi ka miratuar edhe formimin e Komisionit të Pranimit për pozitën e Drejtorit Ekzekutiv në Agjencinë e Kosovës për Produkte dhe Pajisje Medicinale.
Në këtë mbledhje është miratuar edhe ndryshimi dhe plotësimi i vendimit për themelimin e Komisionit për Vlerësimin e Sistemeve të Informacionit dhe Komunikimit me Rëndësi Strategjike.
Një tjetër vendim i rëndësishëm ka qenë vazhdimi i mandatit të Komisionit për Verifikimin e Diplomave të lëshuara nga Universiteti i Mitrovicës së Veriut. Mandati i këtij komisioni është zgjatur për tre muaj, nga 22 qershori deri më 22 shtator 2026.
