Një person është arrestuar të enjten mbrëma në Mitrovicë të Jugut, pasi dyshohet se në gjendje të dehur ka sulmuar një qytetar, duke i shkaktuar lëndime trupore.
Sipas raportit 24-orësh të Policisë së Kosovës, rasti ka ndodhur në rrugën “Lah Nimani”.
Policia bën të ditur se i dyshuari gjatë arrestimit ka sulmuar një zyrtar policor në vendin e ngjarjes, ndërsa më pas në stacion policor dhe në spital ka sulmuar edhe dy zyrtarë të tjerë policorë dhe i ka kanosur verbalisht me vrasje.
Gjithashtu, ai dyshohet se ka dëmtuar motoçikletën e viktimës dhe një veturë tjetër.
Si pasojë e incidentit, tre zyrtarë policorë dhe viktima kanë pranuar trajtim mjekësor.
Pas përfundimit të trajtimit, i dyshuari është dërguar në mbajtje me vendim të prokurorit.
“Është arrestuar i dyshuari mashkull kosovar, për shkak se në gjendje të dehur në rrugë e kishte goditur viktimën mashkull kosovar duke i ka shkaktuar lëndime trupore. I dyshuari gjatë prangosjes në vendin e ngjarjes ka sulmuar një zyrtar policor, pastaj brenda në stacion policor dhe në spital i ka sulmuar edhe dy zyrtarë policorë dhe i ka kanosur verbalisht me vrasje. I dyshuari ka dëmtuar motoçikletën e viktimës dhe një veturë tjetër. Si pasojë e sulmit tre zyrtarë policorë dhe viktima kanë pranuar tretman mjekësor. I dyshuari pas pranimit të tretmanit mjekësor, me vendim të prokurorit, është dërguar në mbajtje”, thuhet në raportin e Policisë së Kosovës./teve1.info/
