Ministrja në detyrë e Drejtësisë, Donika Gërvalla, ka zhvilluar një takim në Këshillin Gjyqësor të Kosovës me kryesuesin e ri të institucionit, Rrustem Thaqi, me rastin e marrjes së detyrës së tij.
Gjatë takimit, Gërvalla ka theksuar rëndësinë e koordinimit institucional dhe bashkëpunimit të vazhdueshëm ndërmjet institucioneve të drejtësisë, duke vlerësuar se këto mbeten faktorë kyç për rritjen e efikasitetit dhe besueshmërisë së sistemit.
“Forcimi i koordinimit institucional dhe funksionimi i pandërprerë i bashkëpunimit ndërmjet institucioneve të drejtësisë mbeten shtylla kyçe të një sistemi që synon standarde më të larta të efikasitetit dhe besueshmërisë publike”, ka thënë Gërvalla.
Ajo ka nënvizuar se avancimi i reformave në drejtësi kërkon përkushtim të përbashkët institucional dhe forcim të vazhdueshëm të kapaciteteve, me qëllim garantimin e sundimit të ligjit në Kosovë.
“Përkushtimi i përbashkët për avancimin e reformave në drejtësi, në përputhje me zotimet dhe përgjegjësitë institucionale, përmes thellimit të reformave dhe forcimit të kapaciteteve, mbetet thelbësor për garantimin e zbatimit të qëndrueshëm të sundimit të ligjit në Republikën e Kosovës, në funksion të parimit se kur ligji sundon, Republika fiton”, ka deklaruar Gërvalla.
Sipas njoftimit zyrtar, në takim është diskutuar gjithashtu për çështje të tjera me interes të përbashkët, që synojnë rritjen e efikasitetit të institucioneve të drejtësisë dhe avancimin e mëtejmë të sistemit gjyqësor në vend./teve1.info/
