Gjykata Kushtetuese e Kosovës ka shpallur të pavlefshëm një aktgjykim të Gjykatës Supreme që kishte rrëzuar ndryshimet e bëra nga Këshilli Prokurorial i Kosovës (KPK) në rregulloren për Koordinatorin Kombëtar për Luftimin e Krimit Ekonomik, duke konstatuar se Supremja ka shkelur të drejtën për gjykim të drejtë dhe pavarësinë institucionale të KPK-së.
Vendimi është marrë në rastin KI331/25, pas kërkesës së Këshillit Prokurorial të Kosovës për vlerësimin e kushtetutshmërisë së aktgjykimit të Gjykatës Supreme të 14 korrikut 2025. Kushtetuesja vendosi njëzëri se kishte pasur shkelje të nenit 31 të Kushtetutës, që garanton të drejtën për gjykim të drejtë dhe të paanshëm, si dhe të nenit 110 që garanton pavarësinë e KPK-së.
Për pasojë, ajo e anuloi vendimin e Supremes dhe e ktheu çështjen për rishqyrtim.
Kontesti lidhej me pozitën e Koordinatorit Kombëtar për Luftimin e Krimit Ekonomik, funksion që prej vitit 2013 mbahej nga prokurori Shqipdon Fazliu.
Në prill të vitit 2025, KPK kishte ndryshuar rregulloren ekzistuese, duke përcaktuar që mandati i Koordinatorit Kombëtar të jetë trevjeçar me mundësi rizgjedhjeje edhe për një mandat tjetër.
Pas hyrjes në fuqi të rregullores së re, Fazliu e kishte paditur KPK-në në Gjykatën Supreme, duke pretenduar se ndryshimet kishin efekt retroaktiv dhe cenonin pozitën e tij.
Supremja e kishte pranuar padinë, duke vlerësuar se KPK nuk mund të ndryshonte në mënyrë të njëanshme statusin e Koordinatorit pa koordinim me institucionet nënshkruese të Memorandumit të Bashkëpunimit dhe se kufizimi i mandatit ishte bërë pa bazë të mjaftueshme ligjore.
Megjithatë, Gjykata Kushtetuese arriti në përfundim të kundërt. Sipas saj, Kushtetuta dhe Ligji për KPK-në nuk e obligojnë këtë institucion që për çështjet e organizimit të brendshëm të konsultohet me palë të tjera, përfshirë edhe për caktimin e prokurorëve në pozita të veçanta. Gjykata theksoi se KPK gëzon pavarësi institucionale në organizimin e brendshëm, përderisa vepron në përputhje me Kushtetutën dhe ligjet në fuqi.
Kushtetuesja po ashtu vlerësoi se rasti nuk mund të krahasohet me vendimet e mëparshme që kishin të bënin me kufizimin e mandateve të anëtarëve të KPK-së, pasi pozita e Koordinatorit Kombëtar nuk kishte mandat të përcaktuar qartë me ligj apo me rregulloren e vitit 2013. Sipas Gjykatës, mandati i përhershëm i Fazliut ishte ai i prokurorit, ndërsa funksioni i Koordinatorit ishte një detyrë e caktuar nga KPK-ja.
