Policia e Kosovës ka njoftuar se të premten në Stacionin Policor në Viti është paraqitur një qytetare, e cila ka raportuar se kishte gjetur një portofol.
Sipas policisë, brenda portofolit ndodheshin dokumente personale, karta bankare si dhe një shumë parash të gatshme.
Pas pranimit të portofolit, zyrtarët policorë të Stacionit Policor në Viti kanë ndërmarrë veprimet e nevojshme operative.
Pas verifikimit të dokumentacionit dhe zbatimit të procedurave ligjore, është identifikuar dhe kontaktuar pronari legjitim, të cilit i janë kthyer të gjitha gjërat e humbura.
Drejtoria Rajonale e Policisë në Gjilan ka shprehur mirënjohje për qytetaren që dorëzoi portofolin, duke vlerësuar veprimin e saj si shembull të përgjegjësisë qytetare.
“Ky rast dëshmon edhe një herë se bashkëpunimi i ngushtë dhe besimi i ndërsjellë ndërmjet qytetarëve dhe Policisë së Kosovës është shtylla kryesore e sigurisë dhe mirëqenies në komunitet”, thuhet në njoftimin e policisë./teve1.info/
