Ministri për Evropën dhe Punët e Jashtme i Shqipërisë, Ferit Hoxha, ka përkujtuar 27-vjetorin e Ditës së Çlirimit të Kosovës, duke e cilësuar 12 Qershorin si një nga momentet më të rëndësishme në historinë moderne të vendit.
Hoxha tha se kjo datë shënon fundin e një periudhe të dhimbshme të dhunës, represionit dhe spastrimit etnik, si dhe fillimin e rrugëtimit të Kosovës drejt lirisë, paqes dhe ndërtimit të një shteti demokratik.
“Sot, në 27-vjetorin e Ditës së Çlirimit, nderojmë me respekt sakrificën e të gjithë atyre që kontribuan për lirinë e Kosovës”, u shpreh ai në një postim në rrjetet sociale.
Hoxha vlerësoi progresin e arritur nga Kosova në forcimin e institucioneve demokratike dhe rritjen e rolit të saj në arenën ndërkombëtare, duke theksuar se liria duhet parë edhe si përgjegjësi.
“Liria nuk është vetëm një e drejtë e fituar, por edhe një përgjegjësi që duhet ruajtur dhe forcuar për brezat që vijnë”, përfundon mesazhi i ministrit.
