Ambasadori i Britanisë së Madhe në Kosovë, Jonathan Hargreaves, dhe ai i Gjermanisë në Kosovë, Rainer Rudolph, në një intervistë ekskluzive për KosovaPres, kanë folur në lidhje me Asociacionin e Komunave me Shumicë Serbe dhe vetëqeverisjen për komunat me shumicë serbe.
Ambasadori britanik tha se Kosova ka marrë zotime, veçanërisht në Bruksel dhe Ohër që lidhen me një formë kuptimplotë të vetëqeverisjes për komunat me shumicë serbe dhe se e rëndësishme është që Kosova t’i përmbushë këto zotime dhe të dalë me propozime konkrete.
“Siç e dini, Kosova ka marrë zotime, veçanërisht në Bruksel dhe Ohër, që lidhen me një formë kuptimplotë të vetëqeverisjes për komunat me shumicë serbe. Jam i sigurt se ka shumë mënyra për ta realizuar këtë. E rëndësishme është që Kosova t’i përmbushë këto zotime dhe të dalë me propozime konkrete. Nëse nuk i pëlqejnë propozimet e deritanishme, mund të paraqesë të tjera që përmbushin angazhimet që tashmë ka pranuar. Prandaj mendoj se ekziston mundësia që Kosova të ecë përpara në këtë drejtim. Dhe kjo është shumë e rëndësishme, sepse pa këtë do të jetë e vështirë që i gjithë procesi të vazhdojë. Kjo është gjithashtu një çështje që mund t’u japë besim miqve të Kosovës, të cilët e mbështesin përparimin e saj. Ne jemi miq të Kosovës dhe duam ta ndihmojmë të ecë përpara në këto procese. Përparimi drejt një forme asociacioni apo vetëqeverisjeje do të na jepte më shumë besim për ta mbështetur fuqishëm këtë proces”, tha Hargreaves për KosovaPress.
Kurse, ambasadori gjerman foli për rrezikimin e fondeve të Kosovës nga BE-ja në rast se nuk funksionalizohet kuvendi.
“Në fund të këtij muaji, Kosova rrezikon të humbasë fonde nga Bashkimi Evropian, sepse disa objektiva dhe kritere të dakorduara nuk mund të përmbushen. Ato nuk mund të realizohen pa funksionimin e Kuvendit. Nëse kjo ndodh, po flasim për vetëm dy javë nga tani, Kosova mund të humbasë shuma të konsiderueshme financiare. Por kjo është gjithashtu një sinjal për mënyrën se si po funksionon bashkëpunimi. Dhe kjo nuk ka të bëjë as me aplikimin për anëtarësim në BE, as me dialogun me Beogradin. Kjo është punë që mund të bëhet këtu, në Kosovë”, tha Rudolph për KosovaPress.
