Ushtruesja e Detyrës së Presidentes së Republikës së Kosovës, Albulena Haxhiu, ka marrë pjesë në Samitin e Procesit të Bashkëpunimit të Evropës Juglindore (SEECP), të mbajtur në Sofje të Bullgarisë më 10 qershor 2026.
Në fjalën e saj para liderëve rajonalë, Haxhiu ka theksuar rëndësinë e bashkëpunimit rajonal, sigurisë dhe integrimit evropian të vendeve të Ballkanit Perëndimor, duke e cilësuar SEECP-në si një platformë kyçe për stabilitetin dhe zhvillimin e rajonit.
Ajo ka dënuar ashpër agresionin rus kundër Ukraine, duke theksuar se pasojat e luftës po ndikojnë drejtpërdrejt në sigurinë evropiane, përfshirë Evropën Juglindore.
Duke riafirmuar orientimin strategjik të Kosovës drejt Bashkimit Evropian, ushtruesja e detyrës së Presidentes ka nënvizuar përkushtimin institucional për reforma të thella në sundimin e ligjit, zhvillimin ekonomik dhe rritjen e qëndrueshme.
Ajo ka theksuar se progresi i Kosovës është reflektuar në indekse ndërkombëtare dhe në avancimin e procesit të integrimit evropian.
Në këtë kontekst, Haxhiu ka kërkuar avancimin e mëtejshëm të procesit të integrimit, përfshirë marrjen e statusit të vendit kandidat dhe hapjen e negociatave për anëtarësim në BE, duke insistuar që procesi të mbetet meritokratik dhe i bazuar në përmbushjen e standardeve.
“Mbi 90 për qind e qytetarëve tanë e mbështesin anëtarësimin në Bashkimin Evropian, një nga nivelet më të larta të mbështetjes në rajon. Ky përparim është konkret, i matshëm dhe duhet të njihet. Prandaj kjo duhet të çojë në një vendim për statusin e vendit kandidat, dhe ne jemi të gatshëm ta nisim punën për hapjen e negociatave të anëtarësimit”, ka pohuar U.D. Presidentja Haxhiu.
Po ashtu, ajo ka theksuar rëndësinë e integrimit ekonomik rajonal, projekteve infrastrukturore strategjike dhe zbatimit të marrëveshjeve ekzistuese, duke kërkuar trajtim të barabartë për të gjitha vendet e rajonit në organizatat rajonale.
Në përfundim, Haxhiu e ka vlerësuar SEECP-në si një mekanizëm të rëndësishëm për thellimin e bashkëpunimit dhe ritheksoi gatishmërinë e Kosovës për të kontribuar në forcimin e stabilitetit dhe perspektivës evropiane të rajonit./teve1.info/
