Presidenti i Ukrainës, Volodymyr Zelensky, i ka bërë thirrje presidentit rus Vladimir Putin për një takim ballë për ballë, duke deklaruar se është i gatshëm për një armëpushim të plotë me qëllim përfundimin e luftës që vazhdon prej më shumë se katër vitesh.
Në një letër të hapur të publikuar të enjten dhe të dërguar zyrtarisht në Moskë, Zelensky i kërkoi liderit rus të angazhohet drejtpërdrejt në negociata, duke theksuar se vetëm udhëheqësit mund të marrin vendimet kyçe për çështjet territoriale dhe përfundimin e konfliktit.
“Zgjedhja është e juaja tani. Mjaft më me luftën. Ukraina propozon t’i japë fund kësaj lufte përmes angazhimit të drejtpërdrejtë mes nesh. Po propozoj një takim”, shkroi Zelensky.
Presidenti ukrainas i kërkoi Putinit të caktojë një datë të qartë për takimin, duke shtuar se “nuk duhet të ketë frikë të zgjedhë rrugën e daljes nga lufta”.
Në letrën e tij, Zelensky kujtoi se kur Putin erdhi në pushtet më shumë se 26 vjet më parë, shumë ukrainas e shihnin pozitivisht.
Sipas tij, kjo perceptim ka ndryshuar rrënjësisht pas pushtimit rus të Ukrainës.
Ai e akuzoi Putinin se ka kaluar gati gjysmën e kohës së tij në pushtet duke zhvilluar luftë kundër Ukrainës dhe e cilësoi konfliktin si “një zgjedhje personale”, duke hedhur poshtë argumentet ruse për NATO-n, gjeopolitikën apo mbrojtjen e gjuhës ruse.
“Kjo luftë është zgjedhja juaj personale – një luftë pa shkak të vërtetë. Kështu do ta kujtojë historia”, thuhet në letër, raporton Euronews.
Zelensky theksoi se Ukraina ndien çdo humbje njerëzore dhe nuk dëshiron një luftë të përhershme.
“Ne po humbim njerëzit tanë dhe çdo humbje është e dhimbshme për ne. Ne nuk duam një luftë të përhershme. E dimë shumë mirë se jeta pa luftë është pafundësisht më e mirë dhe duam ta arrijmë këtë”, shkroi ai.
Presidenti ukrainas shtoi se beson se shumica e qytetarëve rusë do ta mbështesnin një rrugë drejt paqes.
Ndërkohë, Kremlini reagoi duke deklaruar se Zelensky është i mirëpritur të vizitojë Moskën “në çdo kohë”. Zëdhënësi i Kremlinit, Dmitry Peskov, tha se Putin ende nuk e kishte parë letrën në momentin e reagimit.
Kjo është hera e parë që Zelensky i drejtohet Putinit me një letër të hapur të tillë që nga fillimi i pushtimit të plotë rus në vitin 2022 dhe një nga thirrjet më të drejtpërdrejta për negociata mes dy liderëve.
