Prokuroria e Posaçme Kundër Korrupsionit dhe Krimit të Organizuar (SPAK) ka zgjeruar hetimet ndaj ish-ministres së Infrastrukturës dhe Energjisë së Shqipërisë, Belinda Balluku, e cila aktualisht është marrë e pandehur për veprën penale të “Shkeljes së barazisë së pjesëmarrësve në tendera apo ankande publike”, në bashkëpunim
Sipas njoftimit zyrtar, pas veprimeve të mëtejshme hetimore, SPAK-u dyshon se Balluku mund të ketë kryer edhe veprat penale të “Korrupsionit pasiv të personave që ushtrojnë funksione publike” dhe “Pastrimit të produkteve të veprës penale apo të veprimtarisë kriminale”, në bashkëpunim.
Me kërkesë të SPAK-ut, Gjykata e Posaçme e Shkallës së Parë ka vendosur masën e sigurimit pasuror “sekuestro preventive” mbi një vilë të ndodhur në resortin turistik “White Rocks” në Gjilekë të Dhërmiut, e cila sipas hetimeve rezulton të jetë në pronësi indirekte të Ballukut.
Pasuria e sekuestruar është një vilë individuale dykatëshe me sipërfaqe 103 metra katrorë, verandë prej 34 metrash katrorë dhe parcelë të rrethuar prej të paktën 300 metrash katrorë.
Sipas SPAK-ut, ekzistojnë dyshime se vila është përfituar si shpërblim i paligjshëm në këmbim të favorizimit të një operatori ekonomik gjatë një procedure prokurimi publik të zhvilluar nga Albcontrol sh.a.
Hetimet kanë evidentuar gjithashtu veprime të dyshuara si fiktive për fshehjen e origjinës dhe pronësisë reale të pasurisë.
Procedura e prokurimit nën hetim lidhet me rikonstruksionin e godinës teknologjike të Albcontrol, me një fond limit prej mbi 88 milionë lekësh, si dhe me një shtesë kontrate me vlerë mbi 14 milionë lekë pa TVSH.
Sipas organit të akuzës, gjatë kohës kur ushtronte detyrën e Drejtoreshës së Përgjithshme të Albcontrol, Balluku dyshohet se ka favorizuar shoqërinë “Eurocol” sh.p.k. në procedurën e tenderimit.
Në këmbim, sipas hetimeve paraprake, ajo dyshohet se ka përfituar një vilë me vlerë rreth 145 mijë euro në resortin turistik në Dhërmi.
SPAK pretendon se për të fshehur pronësinë e pasurisë janë përdorur kontrata dhe veprime juridike të dyshuara si fiktive, ku përfshihen edhe persona të tjerë.
Prokuroria bën të ditur se hetimet vijojnë për dokumentimin e plotë të fakteve, identifikimin e personave të tjerë të përfshirë dhe përcaktimin e përgjegjësive penale për secilin prej tyre.
