Guvernatori i Banka Qendrore e Republikës së Kosovës, Ahmet Ismaili, ka zhvilluar një takim me Krye-Këshilltarin Financiar dhe Drejtorin e Departamentit të Tregjeve Monetare dhe të Kapitalit në Fondi Monetar Ndërkombëtar, Tobias Adrian, ku u diskutuan zhvillimet kryesore në sektorin financiar dhe bashkëpunimi ndërinstitucional.
Gjatë takimit, u trajtuan prioritetet strategjike të BQK-së, si dhe roli i bashkëpunimit të vazhdueshëm me FMN-në në ruajtjen e stabilitetit financiar dhe avancimin e reformave institucionale.
Guvernatori Ismaili theksoi se sektori financiar në Kosovë mbetet stabil dhe me performancë të qëndrueshme.
“Sektori financiar në Kosovë mbetet mirë i kapitalizuar, likuid dhe me performancë të qëndrueshme,” u shpreh ai, duke shtuar rëndësinë e forcimit të mbikëqyrjes së bazuar në rrezik dhe përafrimit me standardet evropiane.
Në këtë kontekst, ai nënvizoi se prioritet mbetet avancimi i kornizës rregullative dhe mbikëqyrëse, si dhe zbatimi i politikave makroprudenciale.
Një pjesë e rëndësishme e diskutimeve iu kushtua edhe zbatimit të Planit Strategjik të BQK-së, i cili synon modernizimin e sektorit financiar dhe përfshin fusha si zhvillimi i sistemeve të pagesave, digjitalizimi financiar, mbrojtja e konsumatorëve dhe forcimi i qeverisjes institucionale.
Po ashtu, bashkëbiseduesit shkëmbyen pikëpamje mbi zhvillimet në mjedisin financiar ndërkombëtar dhe ndikimin e tyre në ekonomitë e vogla dhe të hapura. Në këtë drejtim, u theksua nevoja për politika të kujdesshme dhe mbikëqyrje efektive përballë rreziqeve dhe pasigurive globale.
Në përmbyllje, Guvernatori Ismaili shprehu mirënjohjen për mbështetjen e vazhdueshme të FMN-së.
“BQK vlerëson lart mbështetjen e vazhdueshme të FMN-së, përfshirë asistencën teknike, këshillimin profesional dhe dialogun e rregullt në fusha kyçe,” theksoi ai.
Ai ritheksoi përkushtimin për thellimin e bashkëpunimit me FMN-në, me synim forcimin e mëtejshëm të stabilitetit financiar dhe avancimin e sektorit financiar në përputhje me standardet ndërkombëtare dhe procesin e integrimit evropian.
Vizita e Tobias Adrian në Kosovë ndërlidhet me pjesëmarrjen e tij në konferencën rajonale të nivelit të lartë “Kornizat e politikave dhe rregullimit në një mjedis në ndryshim”, të organizuar nga BQK, ku po diskutohen zhvillimet në fushën e kripto-aseteve, parasë digjitale dhe rregullimit financiar.
