Bashkimi Evropian nuk do të dërgojë mision vëzhgues ndërkombëtar për zgjedhjet e parakohshme parlamentare që do të mbahen më 7 qershor në Kosovë.
Lidhur me mungesën e vëzhguesve ndërkombëtarë në këtë proces zgjedhor, Zyra e Presidencës së Kosovës ka sqaruar se kërkesa e ushtrueses së detyrës së presidentes, Albulena Haxhiu, drejtuar Bashkimit Evropian nuk është injoruar, siç është raportuar në disa media.
Në një reagim për media, Presidenca ka bërë të ditur se ka pranuar përgjigje zyrtare nga BE-ja, ku shpjegohen arsyet e mosdërgimit të një misioni vëzhgues.
“Zyra e Presidentes ka pranuar përgjigje zyrtare nga Bashkimi Evropian, në të cilën theksohet se, për shkak të kohës së shkurtër deri në mbajtjen e zgjedhjeve të reja parlamentare, nuk është i mundur dërgimi i një Misioni Vëzhgues të Zgjedhjeve apo i një Misioni të Ekspertëve Zgjedhorë”, thuhet në reagim.
Sipas Presidencës, në të njëjtën përgjigje BE-ja ka njoftuar se po shqyrton mundësinë e një pranie ndërkombëtare në ditën e zgjedhjeve përmes Zyrës së Bashkimit Evropian në Kosovë, shteteve anëtare dhe partnerëve të tjerë ndërkombëtarë të pranishëm në vend.
“BE-ja ka bërë të qartë se po shqyrton dhe koordinon një prani ndërkombëtare në ditën e zgjedhjeve përmes Zyrës së BE-së në Kosovë, shteteve anëtare të BE-së dhe partnerëve të tjerë të pranishëm në vend”, thuhet më tej në reagim.
Presidenca ka kundërshtuar pretendimet se kërkesa për vëzhgim është shpërfillur nga Brukseli.
“Prandaj, paraqitja e kësaj çështjeje si ‘injorim’ i kërkesës së u.d. Presidentes është e pasaktë dhe nuk pasqyron përmbajtjen e komunikimit zyrtar ndërmjet institucioneve”, theksohet në reagim.
Në fund, Zyra e Presidencës ka ritheksuar se Kosova mbetet e përkushtuar për organizimin e zgjedhjeve të lira, të rregullta dhe transparente.
“Republika e Kosovës ka interes të plotë që procesi i 7 qershorit të zhvillohet me rregull, transparencë dhe në përputhje me standardet demokratike”, përfundon reagimi i Presidencës.
