Kandidati për deputet nga Lidhja Demokratike e Kosovës, Astrit Desku, ka thënë se shqetësimi kryesor i qytetarëve me të cilët po takohen gjatë fushatës zgjedhore lidhet me gjendjen ekonomike dhe koston e jetesës.
Në emisionin “Ditari” në Tëvë1, Desku deklaroi se qytetarët po shprehin pakënaqësi për rritjen e çmimeve, energjisë elektrike dhe mungesën e perspektivës ekonomike.
“Shqetësimet kryesore të qytetarëve janë të lidhura me gjendjen ekonomike dhe jetesën. Këto ndihma që po shpërndahen në kohë fushatash, të cilat në një farë forme janë pjesë e lëmoshës, si dhe problemet e tjera që lidhen me sigurinë dhe komunikimin ndërkombëtar. Por fokusi kryesor është te pjesa ekonomike, rritja e rrymës dhe elementet e tjera që po shkaktojnë pakënaqësi. Nuk po shihet një perspektivë në rritje apo një stabilitet ekonomik”, tha Desku.
Ai kritikoi edhe shpërndarjen e ndihmave financiare gjatë periudhës zgjedhore, duke vlerësuar se ato nuk adresojnë problemet afatgjata të qytetarëve.
“Me këto intervenime ad-hoc, siç janë 100 eurot në kohë fushate, po shkaktohet rritje e inflacionit dhe po ngarkohet shoqëria në të ardhmen”, u shpreh ai.
Desku foli edhe për prioritetet që, sipas tij, duhet t’i ketë shteti, duke theksuar se fondet duhet të orientohen drejt sektorëve më problematikë.
“Problemi është te çështja e prioriteteve. Kosova ka prioritete më të mëdha. Kemi probleme në arsim dhe shëndetësi. Pensionistët përballen çdo ditë me vështirësi, ndërsa në klinika të ndryshme të QKUK-së dhe spitale të tjera ka mungesë barnash. Këto janë elemente që shkaktojnë pakënaqësi te qytetarët”, deklaroi Desku.
