Dy persona të një banke, njëri menaxher dhe tjeri analist bankarë janë arrestuar nga Policia e Kosovës dhe janë dërguar në mbajtje nën dyshimin se kanë ngarkuar pronaren e dy bizneseve me me kredi prej 25 mijë eurove pa dijeninë e saj.
Policia ka bërë të ditur se i menaxheri i bankës ka tejkaluar autorizimet ligjore, duke liruar mjetet në vlerë prej njëzet e katër mijë (24.000,00) euro, ashtu që ka urdhëruar kundërligjshëm të dyshuarin, analist bankarë që të kryej transaksionin e të hollave në llogari të dy bizneseve.
“Pas veprimeve të kundërligjshme të të dyshuarve, kredia në emër të dëmtuarës është ngarkuar me procedurë përmbarimore, e më pas është kallëzuar penalisht në Prokurori nga banka, edhe pse ky subjekt nuk ka ofruar asnjë provë që dëshmon se në emër të saj është realizuar kredia prej njëzet e pesë mijë (25.000,00) euro. Të dyshuarit e lartë cekur, me veprimet e tyre të dëmtuarës i kanë shkaktuar dëm duke e ngarkuar me kredi fiktive, përfshirë edhe përmbarimin pa dijeninë e saj. Të njëjtit janë intervistuar në prani të mbrojtësve, ndërsa me Aktvendim të Prokurorit u është caktuar masa e ndalimit prej 48 orësh, përderisa hetimet për rastin do të vazhdojnë në aspektin financiar, në drejtim te zbardhjes së shumës prej njëzet e pesë mijë (25.000,00) euro”, thuhet në komunikatën e Policisë./teve1.info/
