Pas përmbylljes së afatit për regjistrimin e mërgatës për të votuar nga jashtë vendit, kryetarja e Listës Guxo dhe ministrja në detyrë e Drejtësisë, Donika Gërvalla, ka falënderuar qytetarët e Kosovës në diasporë për pjesëmarrjen e tyre në procesin zgjedhor të 7 qershorit.
Në një videomesazh në Facebook, Gërvalla ka thënë se mbi 142 mijë aplikime për votim përbëjnë një rekord të ri të pjesëmarrjes, më të lartë se në zgjedhjet e vitit 2021 dhe dy herë më shumë se në dhjetor të vitit 2025.
Sipas saj, kjo pjesëmarrje tregon se largësia nuk e zbeh përgjegjësinë qytetare, dashurinë për vendin dhe përkushtimin ndaj së ardhmes demokratike të Kosovës.
“Të dashur bashkëmërgimtarë kudo që jeni, faleminderit që vazhdoni të jeni zemra e Kosovës, pjesë e proceseve të saj demokratike dhe mbështetje e fuqishme e Republikës në çdo cep të botës. Me ju në krah, Kosova është gjithmonë më e fortë. Faleminderit nga zemra”, ka deklaruar ajo.
Ndërkohë, Komisioni Qendror i Zgjedhjeve (KQZ) ka bërë të ditur se janë aprovuar 131,800 kërkesa për votim nga diaspora.
Sipas zëdhënësit të KQZ-së, Valmir Elezi, mënyra më e preferuar e votimit është përmes postës.
Nga të dhënat e KQZ-së, 100,522 qytetarë janë regjistruar për të dërguar fletëvotimin me postë në kutitë postare jashtë Kosovës, 3,502 për t’i dorëzuar ato në kutinë postare të KQZ-së në Kosovë, ndërsa 27,776 janë regjistruar për të votuar fizikisht në përfaqësitë diplomatike.
Në total, KQZ ka pranuar 142,803 aplikime nga diaspora, prej të cilave 131,800 janë aprovuar, 10,907 janë refuzuar dhe 96 janë anuluar./teve1.info/
