Intervistoi: Gojart Jashari
Tëvë 1: Çfarë ju shtyu që të nisni peticionin për liberalizimin e vizave për kosovarët?
Schneeberger: Unë isha duke vizituar Kosovën në maj për herë të parë, për t’u takuar me pro-evropianë dhe për të gjetur partnerë për OJQ-në time dhe me të vërtetë të gjithë, nga biznesmenët te shoferët e taksive, kamerierët në restorant e deri te politikanët më pyetën për liberalizimin e vizave dhe lirinë për të udhëtuar.
Unë kam lindur në Gjermaninë Lindore. E di se si është të jetosh pa lirinë për të udhëtuar. Ndryshe nga shumë politikanë në Evropën Perëndimore, unë e kuptoj dhimbjen e popullit të Kosovës. Kështu që vendosa të filloj këtë fushatë për liberalizimin e vizave gjatë vizitës sime në Kosovë.
Tëvë 1: Sa nënshkrime janë bërë deri tani?
Schneeberger: Sot janë 16.297 nënshkrime.
Tëvë 1: Në cilat institucione e keni dorëzuar peticionin dhe çfarë rezultatesh prisni?
Schneeberger: E dërgova tek Emmanuel Macron, Roberta Metsola, Ursula von der Leyen dhe Charles Michel përpara samitit të BE-së, por nuk kam marrë asnjë përgjigje deri më tani.
Vetoja e fundit vjen nga Franca. Këtu nevojitet më shumë bindje. Unë po e përcjell situatën dhe shpresoj që në mbledhjen e Këshillit për Drejtësi dhe Çështje të Brendshme në tetor të merret vendimi. Do të ishte e rëndësishme që sa më shumë njerëz të nënshkruajnë peticionin për të treguar edhe më qartë se sa i rëndësishëm është liberalizimi i vizave për popullin e Kosovës. Franca, presidenti Macron dhe ministri i brendshëm Gerald Darmanin ende duhet të binden.
Tëvë 1: Si e vlerësoni samitin e fundit BE-Ballkani Perëndimor, a dha sinjale pozitive për liberalizimin e vizave?
Schneeberger: Në samit nuk u bë asnjë hap serioz përpara. Nuk pati liberalizim të vizave për Kosovën, as fillim të negociatave me Shqipërinë dhe Maqedoninë e Veriut, as datë të hyrjes për Malin e Zi e as status kandidati për Bosnjën dhe Hercegovinën. Në shikim të parë, miratimi i parlamentit bullgar [për heqjen e vetos ndaj Maqedonisë së Veriut] duket një hap pozitiv, por kushtet janë absurde. Unë nuk shoh ndonjë përpjekje serioze për zgjerimin e BE-së. Kjo është shumë për të ardhur keq, sepse zgjerimi do të ishte shumë i rëndësishëm për Evropën.
Tëvë 1: Cilat vende mendoni se po e bllokojnë liberalizimin e vizave dhe cilat arsye mendoni se fshihen pas kësaj?
Schneeberger: Kemi kaluar një hap të vogël përpara: Holanda është e gatshme të rishikojë liberalizimin e vizave për Kosovën, por Franca ende po e bllokon atë.
Nuk jam në dijeni për ndonjë arsye të kuptueshme. Unë di vetëm për frikën irracionale të humbjes së pushtetit pas çdo hapi drejt zgjerimit të BE-së. Është krejtësisht e papranueshme që njerëzit të izolohen si pasojë e kësaj, si në kohën e Perdes së Hekurt.
Tëvë 1: A mendoni se nevojitet një udhërrëfyes shtesë për liberalizimin e vizave, siç tha komisioneri Varhelyi?
Schneeberger: Jo, nuk ka nevojë për një udhërrëfyes shtesë. Liberalizimi i vizave për Kosovën mund të implementohet menjëherë. Të gjitha kërkesat e reja shërbejnë vetëm për vonesë të mëtejshme. Kjo vonesë duhet të ndalet përfundimisht.
Tëvë 1: A ka një datë kur mendoni se do të jepet drita jeshile për liberalizimin e vizave për Kosovën?
Schneeberger: Liberalizimi i vizave duhet të vijë në mbledhjen e ardhshme të Ministrave të Punëve të Brendshme të vendeve të BE-së. Gjithçka tjetër është vazhdimësi e diskriminimit ndaj popullit të Kosovës, cilësi kjo e padenjë për BE-në.
