Kryeministri në detyrë, Albin Kurti, ka marrë pjesë në tryezën e organizuar për Shënimin e Ditës Ndërkombëtare të Familjes, ku lavdëroi hapat që qeveria e udhëhequr prej tij i ka marrë në mbështetje të mijëra familjeve, sipas tij.
Kurti tha se “politika për familjen dhe mirëqenien e saj”, do të ishte përshkrimi i saktë i qeverisjes së tyre në shënimin e Ditës Ndërkombëtare të Familjes, pasi tha se familja është trajtuar jo si diçka e ndarë dhe jashtë kontekstit zhvillimor, por në tërësinë e politikave sektoriale dhe në kuadrin e gjerë të vendimmarrjes.
“Për herë të parë në Kosovë kemi nisur me aplikimin e shtesave nga të cilat kanë përfituar mbi 400 mijë fëmijë. Kur e nisëm me 10 e 20 euro, pati tallje e përqeshje për një politikë të këtillë, por vetëm e vetëm që të njëjtit ta fillojnë garën me zotime elektorale numra më të mëdhenj. E sot, çdo familje që plotëson kushtet merr shtesa prej 30 deri në 45 euro, varësisht nga numri i fëmijëve… Ndërkaq zotimi ynë është që në mandatin e plotë që e synojmë edhe një herë, shtesat për fëmijë t’i dyfishojmë në 60 deri në 90 euro. Paralelisht me këtë kemi filluar me shtesat për lehona që kanë përfituar mbi 80 mijë nëna. Njësoj si për fëmijët, edhe këto i kemi gjetur zero. Nisën me 170 euro në muaj, aktualisht janë 325.9 euro, por me synimin që ato t’i ngrisim në 500 euro në muaj”, tha Kurti.
Tutje, Kurti u shpreh se përtej numrave, kjo është politikë zhvillimore me elemente emancipuese shoqërore, pasi tha se në qeverisjen e tij, më shumë se 100 mijë gra kanë hapur për herë të parë xhirollogari me qëllim të pranimit të shtesave për fëmijë.
Ai më tej përmendi edhe subvencionimin e librave shkollorë, subvencionimin e faturave të energjisë dhe grantet e subvencionet në bujqësi nga të cilat u shpreh se kanë përfituar mijëra familje.
“Familjeve ua kemi ulur shpenzimet duke subvencionuar drejtpërdrejtë librat shkollorë dhe materialet shkollore, me më shumë se 400 mijë nxënës përfitues, me një proces i cili i shmang abuzimet dhe keqpërdorimet dhe po ashtu duke punësuar qindra asistentë për fëmijë me nevoja të veçanta por edhe duke ndarë bursa për studentë… Më shumë se 200 mijë familje kanë përfituar nga subvencionimi i faturave të energjisë në dimrin e vështirë në mes viteve 2022-23. Ndërkaq, në kuadër të programit për mbrojtjen e konsumatorëve të cenueshëm, më vonë kanë përfituar edhe 90 mijë familje të tjera të kualifikuara. Në bujqësi, mbi 120 mijë përfitues nga subvencionet dhe grantet, janë familje që qeveria i ka dalë në krah”, tha Kurti.
Këtë vit, 15 Maji si Dita Ndërkombëtare e Familjes në Kosovë shënohet me temën “Familjet, pabarazitë dhe mirëqenia e fëmijëve”.
