Një mësimdhënëse 43-vjeçare ka dorëzuar në Stacionin Policor të Ferizaj një portofol me një shumë të konsiderueshme parash, të cilin e kishte gjetur në afërsi të rrugës “Agim Matoshi”.
Në njoftimin zyrtar të Policisë së Kosovës thuhet se, në portofol ndodheshin 2030.85 euro.
Policia bëri të ditur se, meqenëse pronari i portofolit ende nuk ishte identifikuar, hetuesit kanë dalë në vendin e ngjarjes për të verifikuar kamerat e sigurisë në zonë.
Më pas, në stacionin policor është paraqitur qytetarja me inicialet L.K., 22-vjeçare nga Ferizaj, me banim të përkohshëm në Gjermani, e cila ka raportuar humbjen e portofolit.
Pas verifikimeve të kryera nga policia, pronares së ligjshme i janë kthyer portofoli dhe shuma e parave.
Drejtoria Rajonale e Policisë në Ferizaj ka falënderuar publikisht zonjën A. Mehmeti për gjestin human dhe shembullor, duke vlerësuar se ky veprim forcon besimin mes qytetarëve dhe policisë./teve1.info/
