Republika e Kosovës ka pranuar zyrtarisht Planin e Punës mbi Punësimin dhe Politikat Sociale të Procesit të Berlinit, gjatë Ministerialit të mbajtur në Berlin.
Lajmin e bëri të ditur ministri në detyrë për Punë, Familje dhe Vlerat e Luftës Çlirimtare të Republikës së Kosovës, Andin Hoti.
Sipas tij, pranimi i këtij dokumenti përbën një hap të rëndësishëm në avancimin e politikave sociale dhe të punësimit në Kosovë, në përputhje me standardet evropiane.
“Pata kënaqësinë ta pranoj Planin e Punës, këtë dokument të rëndësishëm, nga znj. Bärbel Bas, Ministre Federale për Punë dhe Çështje Sociale e Republikës Federale të Gjermanisë, njësoj sikurse kolegët nga gjashtë shtetet e Ballkanit Perëndimor në kuadër të konferencës së sotme me fokus në avancimin e politikave të punësimit dhe atyre sociale së bashku”, ka deklaruar Hoti.
Ai ka theksuar se pranimi i këtij dokumenti shënon një moment vendimtar në rrugën integruese të Kosovës dhe në forcimin e bashkëpunimit rajonal.
“Ky zhvillim i jep një impuls të ri dhe të pakthyeshëm rrugëtimit tonë drejt standardeve evropiane në politikat e punësimit dhe ato sociale”, ka shtuar Hoti.
