Ish-deputetja e LDK-së, Hykmete Bajrami ka bërë thirrje për mbështetje më të madhe ndaj sektorit të bujqësisë, me theks të veçantë te industria e qumështit në Kosovë.
Ajo ka deklaruar se institucionet duhet të subvencionojnë të gjithë zinxhirin e prodhimit të qumështit – nga fermerët te përpunuesit dhe tregtarët – në mënyrë që produktet vendore të jenë më konkurruese ndaj importeve.
Sipas Bajramit, dallimi në çmim mes qumështit vendor dhe atij të importuar nuk duhet të kalojë 20 cent për litër, pasi vetëm kështu konsumatorët do të orientohen drejt produkteve vendore.
Ajo tha se këto masa mbështetëse duhet të vazhdojnë deri në stabilizimin dhe konsolidimin e plotë të sektorit, ndërsa kërkoi që politika të ngjashme të zbatohen edhe për prodhime të tjera bujqësore.
Ajo shtoi se pas zgjedhjeve të 7 qershorit, prioritet i institucioneve duhet të jetë stabiliteti politik dhe zhvillimi ekonomik i vendit.
