Gjykata Themelore në Prishtinë ka refuzuar kërkesën e Prokurorisë Themelore për caktimin e masës së paraburgimit ndaj tre të pandehurve të dyshuar për disa vepra penale që lidhen me keqpërdorim detyre, ryshfet, mashtrim dhe falsifikim dokumentesh.
Sipas njoftimit të gjykatës, Departamenti për Krime të Rënda ka vendosur që ndaj të pandehurve me inicialet F.S., L.R. dhe N.S. të caktohen masa alternative të sigurisë.
I pandehuri F.S. dyshohet për veprat penale “Keqpërdorimi i pozitës apo autoritetit zyrtar”, “Keqpërdorimi i informatës zyrtare” dhe “Marrja e ryshfetit”. Ndërkaq, L.R. dyshohet për “Mashtrim” dhe “Falsifikim të dokumentit”, kurse N.S. për “Falsifikim të dokumenteve”, “Legalizim të përmbajtjes së rreme” dhe “Deklarim të rremë nën betim”.
Pas shqyrtimit të kërkesës dhe dëgjimit të palëve, gjyqtari i procedurës paraprake ka vendosur që të refuzojë paraburgimin dhe të caktojë masën “Ndalimi për t’iu afruar vendit apo personit të caktuar” në kohëzgjatje prej një muaji, nga 7 maji deri më 7 qershor 2026.
Sipas aktvendimit, tre të pandehurit obligohen që të mos i afrohen në një distancë prej 200 metrash Komunës së Prishtinës dhe Agjencisë Kadastrale të Kosovës.
Po ashtu, ndaj tyre është shqiptuar edhe masa e paraqitjes në stacion policor për një muaj. Gjykata ka paralajmëruar se mosrespektimi i këtyre masave mund të çojë në caktimin e paraburgimit.
Gjykata ka bërë të ditur se me masat e shqiptuara konsideron se do të sigurohet zhvillimi i papenguar i procedurës penale./teve1.info/
