Policia e Kosovës ka njoftuar se ka nisur hetime lidhur me kërcënimet e bëra ndaj kryeministrit në detyrë, Albin Kurti, nga organizata “Severna Brigada”, e shpallur terroriste nga institucionet e Kosovës.
Sipas Policisë, rasti është duke u trajtuar nga Drejtoria për Hetimin e Krimit të Organizuar dhe Krimeve të Rënda, në koordinim me Prokurorinë Speciale dhe me mbështetjen e njësisë për hetimin e krimeve kibernetike.
Në reagim thuhet se kërcënimi është publikuar më 8 maj 2026 në rrjetet sociale përmes profilit “Severna Brigada”, i njohur edhe si “Brigada e Veriut”.
Hetimet paraprake kanë konstatuar se postimi është bërë nga territori i Serbia, konkretisht nga qyteti i Kraljevo.
Policia ka bërë të ditur se janë identifikuar IP-adresa e përdorur dhe disa të dhëna personale të shfrytëzuara gjatë regjistrimit të llogarisë në rrjetin social.
Sipas autoriteteve, njësitë kompetente kanë siguruar edhe informacione shtesë që pritet të ndihmojnë në vazhdimin e hetimeve lidhur me rastin.
“Bazuar në të dhënat e siguruara, postimi është bërë nga territori i Republikës së Serbisë, konkretisht nga qyteti i Kralevës në Republikën e Serbisë. Me këtë rast janë identifikuar IP-adresa e përdorur dhe të dhënat personale të përdorura gjatë regjistrimit”, thuhet në njoftim.
