Ish-deputeti i LVV-së, Agim Bahtiri ka reaguar ndaj deklaratave të ish-deputetes së LDK-së, Jehona Lushaku, duke i quajtur shpifje pretendimet se ai kishte qenë “gjysmë i dehur” në natën kur kishte kërkuar nënshkrime lidhur me procesin e zgjedhjes së Presidentit.
Në reagimin e tij, Bahtiri mohoi kategorikisht akuzat, duke thënë se deklaratat e Lushakut janë të pavërteta dhe tendencioze.
“Unë shkova në emër të LVV-së, u konsultova me kryeministrin Albin Kurti. Shkova sinqerisht, burrërisht, njerëzisht për t’i marrë 15 nënshkrimet e LDK-së. Për deklaratën e Lushakut… është skandaloze, e turpshme, e pa durueshme, e pa pranueshme. Kurrë në jetën time, i kam bërë 66-vite s’kam qenë i dehur. Pasi që e dëgjova deklaratën, e bëra një status dhe i thash që të kërkojë falje, përndryshe do të shihemi në gjykatë”, deklaroi ai në emisionin “Këndi i Debatit” në Tëvë1.
Bahtiri thotë se Lushaku ka kohë deri të martën të kërkojë falje, përndryshe do ta padisë.
“Unë po e pres Lushakun, në qoftë se nuk kërkon falje deri të martën – do ta dorëzojë padinë, pasi që e kam gati. Pra, do ta padis. Sepse, t’i thuash Agim Bahtirit i dehur, ky është turpi më i madh që mund të ndodhë në histori”, tha ai.
