Ministrja në detyrë e Drejtësisë, Donika Gërvalla, ka pritur në takim përfaqësuesen rajonale të UNHCR-it për Evropën Qendrore, Nicole Epting, me të cilën ka diskutuar për bashkëpunimin institucional në fushën e ndihmës juridike falas dhe çështjet që lidhen me refugjatët.
Sipas njoftimit, gjatë takimit është theksuar rëndësia e avancimit të legjislacionit për ndihmë juridike falas dhe forcimit të mekanizmave që mundësojnë qasje më të lehtë në drejtësi për kategoritë në nevojë.
Po ashtu, palët kanë diskutuar për vazhdimin e bashkëpunimit institucional në këtë fushë, me fokus në përmirësimin e mbështetjes ligjore për qytetarët dhe grupet e cenueshme.
Gërvalla ka ritheksuar prioritetet e Ministrisë së Drejtësisë në kuadër të reformës në drejtësi dhe harmonizimit të legjislacionit me standardet e Bashkimit Evropian.
Në takim është diskutuar edhe për modelet e ndryshme të ofrimit të ndihmës juridike falas në vendet e Bashkimit Evropian dhe të Ballkanit Perëndimor, si pjesë e shkëmbimit të praktikave më të mira në këtë fushë./teve1.info/
