Ministri në detyrë i Punëve të Brendshme të Kosovës, Xhelal Sveçla, është pritur në takim nga ministri i Brendshëm i Republikës së Turqisë, Mustafa Çiftçi, në kuadër të vizitës së tij zyrtare në Stamboll.
Përmes një njoftimi në Facebook, Sveçla bëri të ditur se gjatë takimit e falënderoi homologun turk për ftesën, mikpritjen dhe gatishmërinë për thellimin e bashkëpunimit ndërmjet Kosovës dhe Turqisë.
Ai ka theksuar marrëdhëniet e mira ndërmjet dy vendeve dhe ka vlerësuar kontributin e Turqisë në sigurinë rajonale dhe stabilitetin në Kosovë, përmes angazhimit në misionin KFOR dhe bashkëpunimit të ngushtë me Policinë e Kosovës.
Sveçla ka vlerësuar gjithashtu partneritetin dhe mbështetjen e vazhdueshme të Turqisë ndaj Ministrisë së Punëve të Brendshme, veçanërisht në ngritjen e kapaciteteve profesionale të Policisë së Kosovës përmes trajnimeve dhe bashkëpunimit operacional.
Sipas tij, gjatë takimit është diskutuar edhe avancimi i bashkëpunimit në fushën e sigurisë, përfshirë furnizimin me pajisje moderne për Policinë e Kosovës dhe mundësitë për projekte të përbashkëta me kompanitë turke të industrisë së mbrojtjes.
Ministri në detyrë ka nënvizuar rëndësinë e projektit strategjik për hapjen e fabrikës së municionit në Kosovë, si dhe përkushtimin institucional në luftën kundër krimit të organizuar dhe terrorizmit, si dhe në ruajtjen e sovranitetit dhe integritetit territorial të Kosovës.
Në fund të takimit, Sveçla ka riafirmuar gatishmërinë për thellimin e bashkëpunimit bilateral ndërmjet dy shteteve dhe e ka ftuar ministrin turk për një vizitë zyrtare në Kosovë, me synim avancimin e projekteve konkrete dhe nënshkrimin e marrëveshjeve me interes të përbashkët, përfshirë njohjen reciproke të patentë-shoferëve./teve1.info/
