Ekspertja e Organizatës Botërore të Shëndetësisë, Maria Van Kerkhove, ka thënë se situata aktuale me hantavirusin nuk është fillimi i një pandemie të ngjashme me Covid-19.
E pyetur për dallimin mes këtij shpërthimi dhe ditëve të para të pandemisë së koronavirusit, ajo tha se nuk jemi në të njëjtën situatë si gjashtë vite më parë.
Ajo ishte e qartë duke theksuar se nuk bëhet fjalë për SARS-CoV-2 dhe as për fillimin e një pandemie të re Covid.
Sipas saj, ky është një shpërthim i kufizuar që po ndodh në një anije, dhe jo një situatë globale e përhapjes së virusit.
Van Kerkhove sqaroi se ky infeksion nuk përhapet në të njëjtën mënyrë si koronaviruset, por përmes kontaktit të afërt dhe intim.
Ajo shtoi se masat që po ndërmerren në anije janë parandaluese, me qëllim që të shmanget çdo përhapje e mëtejshme e mundshme.
Pesë raste të Hantavirus u konfirmuan në një anije turistike që u nis nga Argjentina, ndërsa tre persona kanë vdekur gjatë ose pas udhëtimit.
OBSH thotë se mund të ketë edhe raste të tjera për shkak të periudhës së gjatë të inkubacionit (deri në 6 javë).
Anija po shkon drejt Ishujve Kanarie, ndërsa po vazhdon gjurmimi i pasagjerëve në disa vende evropiane. Origjina e shpërthimit ende nuk është e sigurt, megjithatë disa hetues i kanë thënë AP-së për dyshimin që çifti i ndjerë, të cilët ishin pasagjerë në anije, mund të jenë infektuar në Argjentinë, ku po vëzhgonin shpendë./kp
