Kafeja është një nga pijet më të konsumuara në botë dhe për shumë njerëz dita nuk nis pa një filxhan të saj. Studime të shumta tregojnë se kafeina mund të ketë përfitime të rëndësishme për organizmin, duke rritur energjinë, vigjilencën dhe përqendrimin. Megjithatë, ekspertët paralajmërojnë se ekziston një kufi i sigurt për konsumimin e saj ditor.
Një kafe ekspres mjafton për të rritur përkohësisht energjinë dhe aftësinë për t’u fokusuar. Por kur konsumohet në sasi të larta, kafeina mund të shkaktojë efekte negative si rrahje të shpejta të zemrës, ankth, nervozizëm dhe pagjumësi.
Kafeina është një stimulues natyral që gjendet në farat, gjethet dhe frutat e disa bimëve. Ajo vepron mbi sistemin nervor qendror, duke reduktuar lodhjen dhe përgjumjen. Përveç kafesë dhe çajit, kafeina gjendet edhe në pije energjike, kola dhe disa medikamente.
Çfarë ndodh në trup pas konsumimit të kafesë?
Sipas studimeve, efektet e kafeinës fillojnë të ndihen rreth 45 minuta pas konsumimit dhe arrijnë kulmin brenda një ore. Në këtë periudhë rritet vigjilenca, përqendrimi dhe aftësia për të kryer detyra mendore.
Megjithatë, jo të gjithë e tolerojnë njësoj kafeinën. Disa persona mund të përjetojnë:
- Pagjumësi
- Ankth dhe nervozizëm
- Të përziera dhe shqetësime në stomak
- Dhimbje koke
- Rritje të rrahjeve të zemrës
Sa kafeinë konsiderohet e sigurt?
Ekspertët rekomandojnë që të rriturit të mos konsumojnë më shumë se 400 mg kafeinë në ditë. Kjo sasi konsiderohet e sigurt dhe zakonisht nuk shoqërohet me efekte të rrezikshme për shëndetin.
Kjo përkthehet afërsisht në:
- 5 filxhanë kafe të zier
- 10 kanaçe kola
- 2 pije energjike
Një espresso tradicionale përmban mesatarisht rreth 75 mg kafeinë, ndërsa versionet “freddo” apo kapuçino me dy doza mund të arrijnë deri në 200 mg. Kjo do të thotë se dy kafe të tilla në ditë janë brenda limiteve të rekomanduara, ndërsa tre mund ta tejkalojnë kufirin e sigurt.
Përmbajtja e kafeinës sipas llojit të kafesë
- Kafeja turke: rreth 40 mg për 50 ml
- Kafeja arabica: 80–130 mg
- Robusta: pothuajse dyfish më shumë se arabica
- Kafeja e menjëhershme: 65–100 mg
- Kafeja e ftohtë: rreth 155 mg
- Kafeja me filtër: 75–150 mg
Kujdes nga varësia
Specialistët theksojnë se konsumimi i përditshëm i kafesë mund të krijojë varësi. Nëse vendosni të ulni sasinë e kafesë, kjo duhet bërë gradualisht. Ndërprerja e menjëhershme mund të shkaktojë simptoma abstinence si dhimbje koke, lodhje, nervozizëm dhe vështirësi në përqendrim.
