Edhe pse ushqimi i ngrirë (në rreth -18°C) mund të mbetet i sigurt për t’u konsumuar për një kohë shumë të gjatë, periudhat e rekomanduara të ruajtjes i referohen përgjithësisht kohës gjatë së cilës ushqimi ruan cilësinë e tij më të mirë.
Sipas Departamentit të Shëndetësisë të SHBA-së, shumë ushqime të ngrira e ruajnë cilësinë e tyre më të mirë për të paktën dy muaj, por lloje të caktuara mishi, perimesh mund të qëndrojnë në gjendje të mirë për një kohë më të gjatë.
Keith Warriner, profesor i shkencës së ushqimit pranë Universitetit Guelph në Kanada, shpjegon se ngrirja ndikon në strukturën reale të ushqimit, pasi që kristalet e akullit dëmtojnë qelizat e ushqimit.
Mishi dhe shpendët e gatuar mund të ruajnë cilësi të mirë për afërsisht dy deri në gjashtë muaj.
Ushqimet e mbetura, si pica ose copëzat e pulës, është mirë të konsumohen brenda një deri në tre muaj.
Mishi i grirë i viçit, gjelit të detit ose pulës e ruan cilësinë më së miri për rreth tre deri në katër muaj.
Copat e mëdha të mishit të viçit, qengjit, si biftekët, brinjët dhe mishi për pjekje, mund të ruajnë cilësi të mirë për një periudhë që varion nga afërsisht katër muaj deri në një vit.
Pula ose gjeli i detit i plotë dhe i pa gatuar mund të ruhet në ngrirje deri në një vit.
Pjesët individuale të shpendëve, si gjoksi, krahët apo kofshët, e ruajnë më së miri cilësinë për rreth nëntë muaj.
Shpendët e gatuar kanë një jetëgjatësi dukshëm më të shkurtër dhe rekomandohet të konsumohen brenda afërsisht katër muajve.
Peshqit me pak yndyrë mund ta ruajnë cilësinë e mirë për rreth gjashtë deri në tetë muaj, ndërsa peshqit me yndyrë rekomandohet të konsumohen shumë më herët.
Llojet me yndyrë, si salmoni apo skumbri, është mirë të konsumohen brenda afërsisht dy ose tre muajve.
Shumica e perimeve mund të ruhen në ngrirje për afërsisht tetë deri në 12 muaj, veçanërisht nëse përgatiten siç duhet para ngrirjes.
Për shumë lloje perimesh, rekomandohet zbardhja e shkurtër (kalimi në ujë të valë) para ngrirjes, pasi kjo ngadalëson proceset që ndryshojnë ngjyrën, shijen dhe strukturën.
Megjithatë, jo të gjitha perimet janë të përshtatshme për ngrirje.
Ushqimet me përmbajtje të lartë uji, si sallata jeshile, domatet, trangujt dhe patatet e pa gatuar mund të bëhen të buta, të qullëta ose të ujshme pas shkrirjes.
Shumica e frutave e ruajnë cilësinë më së miri për rreth gjashtë muaj, megjithëse disa lloje mund të zgjasin më shumë.
Ngrirja është veçanërisht praktike për frutat e vogla si manaferrat, boronicat, të cilat më vonë mund të përdoren në ëmbëlsira edhe nëse nuk e ruajnë të njëjtën strukturë si frutat e freskëta pas shkrirjes.
Buka mund ta ruajë cilësinë e mirë në ngrirje për afërsisht tre muaj.
Është ide e mirë që buka të pritet në feta para ngrirjes, në mënyrë që të shkrihet vetëm sasia e nevojshme për një herë.
Është gjithashtu e rëndësishme që ajo të mbështillet mirë për të minimizuar ekspozimin ndaj ajrit dhe për të parandaluar tharjen e saj.
Megjithatë, disa ushqime nuk janë të përshtatshme për t’u ngrirë.
Këtu përfshihen vezët e freskëta dhe ato të ziera fort, sallata jeshile, domatet, trangujt dhe patatet e gjalla.
