Ushtruesja e detyrës së Presidentes së Republikës së Kosovës, Albulena Haxhiu, ka vizituar Shoqatën e Familjeve të të Pagjeturve në Mitrovica, ku është takuar me familjarë të personave të zhdukur me dhunë gjatë luftës.
Sipas njoftimit të Presidencës, gjatë kësaj vizite Haxhiu ka dëgjuar nga afër shqetësimet, kërkesat dhe dhimbjen e familjeve që ende presin informacion për më të dashurit e tyre.
“Në Komunën e Mitrovicës janë ende 104 persona të zhdukur me dhunë, për fatin e të cilëve familjet nuk kanë asnjë informacion. Kjo është plagë e rëndë për familjet, për Mitrovicën dhe për gjithë Republikën e Kosovës”, ka theksuar U.D. Presidentja Haxhiu.
Haxhiu ka nënvizuar se institucionet e Kosovës kanë detyrim të vazhdojnë angazhimin për zbardhjen e fatit të personave të zhdukur, duke theksuar se pengesa kryesore mbetet mungesa e bashkëpunimit nga Serbia.
“Problemi kryesor vazhdon të jetë Serbia, e cila nuk po jep informacionet e nevojshme për fatin e personave të zhdukur me dhunë. Kërkesat e familjeve dhe të nënave që ende presin përgjigje do t’i adresojmë tek institucionet përgjegjëse. Kjo çështje duhet të mbetet në qendër të punës institucionale”, ka thënë U.D. Presidentja Haxhiu.
Gjatë vizitës, ushtruesja e detyrës së Presidentes ka falënderuar Shoqatën e Familjeve të të Pagjeturve për punën shumëvjeçare në mbajtjen gjallë të zërit të familjarëve dhe në kërkimin e së vërtetës.
“Kjo është vizita ime e parë në këtë shoqatë dhe dua t’i falënderoj për punën e madhe që kanë bërë ndër vite. Për shumë kohë, një pjesë të barrës që duhej ta mbanin institucionet pas luftës e kanë mbajtur shoqatat dhe organizatat e familjarëve, përfshirë edhe këtë shoqatë në Mitrovicë”, ka theksuar ajo.
Ajo gjithashtu ka përmendur hapat institucionalë të ndërmarrë për trajtimin e krimeve të luftës dhe forcimin e drejtësisë tranzicionale, përfshirë mundësimin e gjykimit në mungesë, themelimin e mekanizmave për hetimin e krimeve të luftës, rritjen e kapaciteteve në polici dhe prokurori, si dhe miratimin e strategjive përkatëse.
“Për familjarët e viktimave të luftës dhe për familjet e personave të zhdukur me dhunë, drejtësia mbetet kërkesë e përhershme. Prandaj janë ndërmarrë hapa të rëndësishëm, si mundësimi i gjykimit në mungesë, themelimi i Institutit për Krimet e Kryera gjatë Luftës, rritja e kapaciteteve në polici e prokurori dhe miratimi i Strategjisë për Drejtësi Tranzicionale. Këto janë veprime që tregojnë përkushtimin institucional për adresimin e krimeve të luftës dhe për mbështetjen e familjeve”, ka thënë U.D. Presidentja Haxhiu.
