Kryeministrja italiane, Giorgia Meloni paralajmëroi për pasiguri mbi angazhimin e ardhshëm të SHBA-së në NATO, duke i kërkuar Evropës të forcojë kapacitetet e saj të sigurisë dhe të parashikojë më mirë krizat.
Duke folur në një samit në Jerevan, ajo tha se diskutimet në SHBA për një shkëputje nga Evropa tregojnë nevojën që BE-ja të marrë më shumë përgjegjësi për mbrojtjen e vet.
“Nuk mund të them se çfarë do të ndodhë”, u tha Meloni gazetarëve. “E dimë që për njëfarë kohe Shtetet e Bashkuara kanë diskutuar një shkëputje nga Evropa, prandaj mendoj se duhet të forcojmë sigurinë tonë dhe të rrisim kapacitetin tonë për t’iu përgjigjur nga kjo pikëpamje”.
Ajo shtoi se nuk do të mbështeste një tërheqje të SHBA-së nga Evropa: “Është e qartë se është një zgjedhje që nuk varet nga unë dhe me të cilën unë personalisht nuk do të pajtohesha”.
Meloni theksoi se Italia i ka përmbushur vazhdimisht angazhimet e saj në NATO, përfshirë misionet në Afganistan dhe Irak, edhe kur interesat direkte nuk ishin në rrezik, shkruan Anadolu.
“Italia gjithmonë i ka mbajtur angazhimet e saj, përfshirë ato brenda NATO-s, edhe kur interesat tona të drejtpërdrejta nuk kanë qenë të përfshira, siç bëmë në Afganistan dhe Irak”, tha ajo.
Ajo i bëri thirrje BE-së të kalojë nga reagimi ndaj emergjencave në parashikimin e tyre: “Bashkimi Evropian ka treguar se mund t’i përgjigjet emergjencave, por tani është koha që të përmirësojë nivelin e tij dhe të kalojë nga reagimi në aftësinë për t’i parashikuar ato”.
Meloni paralajmëroi se dështimi në menaxhimin e krizave mund të dëmtojë besimin në institucione dhe kërkoi më shumë fokus te fqinjësia, veçanërisht Mesdheu dhe Afrika, duke lidhur sigurinë me sfidat energjetike.
Ajo pritet të vizitojë Azerbajxhanin për të diskutuar furnizime alternative me energji si pjesë e “diplomacisë së energjisë”.
