Kamerat e vendosur në çdo skaj të ndërtese nuk iu lanë përshtypje.
Kjo meqë disa persona, arritën ta thyejnë një banesë në Rrugën C në kryeqytet.
E nga këtu, dy hajdutët nuk dolën duarthatë mbrëmjen e së dielës.
Të njëjtit vodhën gjëra me vlerë mbi 30 mijë euro.
Vet pronari, nga banesa ishte larguar me datën 1 maj.
Por, me tu kthyer në banesë të dielën, vërejti se dikush kishte depërtuar brenda saj.
Kjo e shtyri që menjëherë ta lajmërojë Policinë e Kosovës.
“Me datë 04.05.2026, Policia ka pranuar informatën për një rast vjedhjeje në një banesë në rrugën C në Prishtinë. Menjëherë pas pranimit të informacionit, njësitet përkatëse policore kanë dalë në vendin e ngjarjes dhe kanë ndërmarrë veprimet e nevojshme hetimore”, ka thënë Pllana.
Për këtë rast nga Prokuroria kanë njoftuar se janë identifikuar dy persona.
Mirëpo deri më tani, vetëm njëri nga ta përfundoi nën prangat policore.
“Ju njoftojmë se dy persona kanë kryer veprën penale “Vjedhja e rëndë” sipas nenit 315 te Kodit Penal te Republikës se Kosovës. Prokurori i shtetit ka paraqit kërkese pranë Gjykatës Themelore në Prishtine, për caktimin e masës së paraburgimit”, u shpreh Shala.
Mes tjerash është bërë e ditur se prokuroria i rastit në bashkëpunim me Policinë e Kosovës, është duke i ndërmarre te gjitha masat dhe veprimet e nevojshme hetimore lidhur me ketë çështje.
