Prokuroria Themelore në Pejë ka bërë të ditur se gjatë periudhës janar–prill ka shënuar progres në trajtimin e procedurave alternative, me fokus në ndërmjetësim dhe zgjidhje më efikase të rasteve.
Sipas njoftimit zyrtar, në këtë periudhë janë trajtuar gjithsej 100 raste përmes procedurës së ndërmjetësimit, ku kanë qenë të përfshirë 183 persona.
Ndërkohë, në tri raste ku është aplikuar pezullimi i përkohshëm i procedurës, të dyshuarit janë obliguar të deponojnë gjithsej 4 mijë euro në xhirollogari të fshatit SOS, si formë kompensimi dhe përgjegjësie sociale.
Prokuroria ka bërë të ditur gjithashtu se gjatë kësaj periudhe janë arritur katër marrëveshje për pranimin e fajësisë nga katër persona, ndërsa në rastet ku ndjekja penale nuk është e detyrueshme janë evidentuar dy raste ndaj dy personave.
